Miami Open champion Stephens

US Open champion Sloane Stephens chuan French Open champion Jelena Ostapenko lakah 7-6 (7-5), 6-1 a hnehna chang­in, a vawi khat nan Mia­mi Open nomawi a chawi.

Inrinnia final khelhah player pahnih an inkhel tawk hle, set hmasa zawk­­ah an sevice vawi riat ngawt an inchhuhsak tawn a, tie break khelh a nih hnuah khawtual nula Stephens chu a van­nei zawkah a ṭang. Set hnih­naah Stephens-i'n defen­sive game khelin a fimkhur hle a, game khat chiah hlohin a chak tlang.

World number 5 Ostapenko-i'n a vawi khat nan Miami Open final a khel a, boruak sangah tihsual a ngah. Latvian nula hian unforced error vawi 48 zet neiin, set hloh miah loin final lut thei mah se nomawi inchuhna berah a chet fuh theih miau loh avangin nomawi lian chawi a beiseina chu a thamral a ni.

Kum 25 mi Stephens chuan, "Set khatna harsa taka ka lak hnuah kha chuan inrintawkna ka nei sang tawh a, a hnuhnung zawk kha chu a awlsam tawh a ni. Hun rei tak chhung ka lo nghah tawh angin world number 10 huanga ka tel ve thei tur hi ka lawm hle," tiin ranking chhuak thar tur a ngahhleh thu a sawi.

Florida nula Stephens hian final kalkawngah champion tura rinkai pathum Garbine Muguru­za, Angelique Kerber leh Victoria Azarenka te a hneh thei a, hard court inelna bikah chuan player hmuhnawm leh hlauhawm ber pakhat a ni tawh.