ISL champion hnehtu MPL pahnihna! Chennaiyin FC hnehin Aizawl FC an tho ta

I League club Aizawl FC-in Mizoram Premier League Season 6 final-ah Chhinga Veng an hneh lo a, I League-ah an nomawi an humhim thei lo a, AFC Champions League playoff an paltlang thei lo a, AFC Cup match hmasa berah an chak lo bawk. Mizo club hian tun season-ah besei pha lo mah se AIFF Super Cup match hmasa berah Chennaiyin FC hnehin an tho a, inelna aṭangin Indian Super League champion Chennaiyin an pet chhuak.

Team 16 inelna Super Cup-ah Aizawl FC chu quarterfinal lut hmasa ber an ni a, nizan khan inkhel pahnih awmin zanin dar 8:00 hian Minerva Punjab leh Jamshedpur te an inkhel ang.

Super Cup final hi April 20-ah khelh tur a ni a, quarterfinal erawh Aizawl FC leh Bengaluru FC ten AFC Cup an khelh avangin a hun tihchian a la ni lo.

Thlirna Tawi
ISL leh I League club-te huang khata an dahna Super Cup hi knockout tournament a ni a, Kalinga Stadium, Bhubaneswar-ah khelh a ni.

Aizawl FC-in Andrei Ionescu hmangin minute 21-naah hma an hruai a, ISL club-in Mailson Alves hmangin minute 89-naah an sut hram. Extra time-ah Romanian midfielder Andrei hmangin Mizo club-in hma an hruai nawn a, minute 115-naah Dhanachandra Singh hmangin South Indian club-in an sut nawn.

Minute 120 chhung chak zawk an awm lo a, penalty hmangin chak zawk zawn a ṭul. ISL club tana a vawi hnihnaa pettu Mohammed Rafi-a'n a pet over a, Aizawl FC tana pettu Andrei Ionescu, Leonce Dodoz, Masih Saighani, Lalchhawnkima leh H. Lalmuankima ten an pet goal vek a, 5-3 in an chak.

Kim lo chungin Chennaiyin an ṭha
Chennaiyin FC-in chawlh pek vangin Jeje Lalpekhlua chhawr lo mah se India aiawha fehchhuak zinga tel Jerry Lalrinzuala, Anirudh Thapa leh Dhanapal Ganesh te chu bul an ṭantir a; starting eleven-a tel dang keeper Karanjit Singh, Mohammed Rafi, Dhanachandra Singh, Keenan Almeida leh Francis Fernandes te chu Indian football-a hming langsar tih theih vek an ni.

ISL-ah foreigner pariat ziah luh theih a ni a, Super Cup-ah erawh I League zul zuiin foreigner paruk ziah luh theih niin player panga chin chu playing eleven-ah dah theih a ni.

ISL champion hian foreign player pali chiah ziaklutin Brazilian defender Maílson Alves, Spanish midfielder Jaime Gavilan leh Nigerian forward Jude Nworuh te chu bul an ṭantir a, a palina Raphael Augusto erawh a inlan lo.

Foreigner dang captain Henrique Sereno, Gregory Nelson, Inigo Calderon leh Rene Mihelic te chu Super Cup khel tur zingah tel an ni lo.

Aizawl FC hmachhawn tur hian ISL final-a bul ṭan pangain bul an ṭan nawn a, Bikramjit Singh chu bul ṭan nawn lo mah se second half ṭan chiahah luhtir a ni.

Chutihrualin Mizo club khingpui tura South Indian club chhawp chhuah chin ringawt hi an hlawh aṭanga chhut pawha a tam tham avangin ISL club tan chak loh chhuanlam a tling lo.

An fimkhur nghal
Aizawl FC coach Santosh Kashyap a fimkhur a, inkhel bul ṭantu zingah central defender pali Masih, KimKima, C. Lalrosanga leh Hmingthanmawia te a luhtir nghal a, Afghan defender Masih erawh midfield-ah chhawr niin a position tharah a khel ṭha hle.

ISL club ang thoin Mizo club lamah pawh season ṭantirha an player pawimawh an kim tawh bik lo a, chung zinga langsar chu Nigerian defender Kareem Omolaja a ni a, Japanese forward Yugo Kobayashi leh East Bengal keeper hlui Avilash Paul te an khel lo. Aizawl FC-in keeper-ah Arup Denath an hmang a, tun season-a an keeper chhawr dan thlir chuan ISL hmachhawn tur hian an third keeper an hmang tihna a ni.

Andrei Show
Aizawl FC chu team chhe zawk tur anga ngaih ni mah se inkhel ṭan hnuah erawh Mizo club leh ISL club an inkhingtawk ni mai loin MPL club hian inkhel an thunun a, Romanian midfielder Andrei chu khelmual chhunga player langsar ber a ni.

Mizo club-in inkhel an thunun rah an seng a, minute 23-naah Andrei hian box pawn aṭangin a pet a, Chennaiyin defender-in a dan per hnuah keeper Karanjit-a tan tih theih a awm tawh lo.

Khel chhe zawk Chennaiyin-in first half tawpah ISL club-in chance ṭha bik neiin Thapa ball pek duhthusam chu Rafi-a'n goal-ah pet mah se AFC keeper Arup-a'n a dang.

Fimkhur tawk lo
Chennaiyin si phurh sut tumin Thapa aiah Bikramjit Singh an dah lut a, inkhelah erawh Aizawl FC chan a la ṭha fan a, amaherawhchu coach Kashyap-a'n an goal neih sa venhim a duh avangin Chennaiyin lamin inkhel an thunun ṭan.

Hun tawp lamah Aizawl FC an chesual ta a, Spanish midfielder Gavilan-a cross chu Saighani-a'n a tauh chhuak ṭha tawk lo a, he ball hnek chhuah tumtu keeper Arup-a chu a tlai bakah position a hloh zui a, Thoi Singh-a'n crossbar a tauh per hnuin ISL final-a goal hnih khungtu Mailson-a'n goal ruakah a khung. Minute 90 chhungin 1-0 a ni.

Thawnthu ngai
Extra time an ṭan chiah a, Andrei bawk chu langsar hmasa ber ni lehin Romanian midfielder hian box chhungah MK-a ball pek chu lalutin goal-ah a chantir nghal.

Mizo club-in ISL club an khing tawk chhunzawm zel a, hun tawp lamah erawh an fimkhur loh vangin goal an chhuah. Keeper Arup-a'n amah pui tura a hmaa dingte a thunun ṭha lo a, ball a hmuh miau loh avangin Dhanachandra Singh ball pet chu holam takin Aizawl FC goal-ah a lut.

Chennaiyin an zam ve tho tih a lang zui a, an hun neih tlem te chu nawr zui nana hmang loin an lamah ball an inpe kual a, hun khawhrala penalty shootout hmachhawn an pawi ti lo.

A tawpah Mizo
Penalty shootout hmangin chak zawk zawn a ṭul a, minute 90 chhunga khel ṭha zawk Aizawl FC chu penalty shootout-ah an vannei ta zawk.

Pressure sangah Mizo club tan a tawp pahnihah Mizo tlangval an rawn ding chhuak a, Kimkima'n I League-ah Mohun Bagan lama chakna goal penalty aṭangin a khung tawh a, penalty hlah ngai lo Champhai tlangval hian Super Cup-ah pawh chiang takin a pet goal.

Bawngkawn tlangval MK-a'n a tawp a khar a, Aizawl FC chakna goal a khung a, penalty shootout-ah 5-4 inan chak.

Fapa tlanbo a rawn let
Aizawl FC-in nikum December 31 khan Gokulam Kerala chu khualmualah 2-0 in an hneh a, hnehna an chan theihna kawngah H. Lalmuankima chu player pawimawh a ni.

Mizo club nghawng dawt thei chanchin a awm zui a, Bawngkawn tlangval hian ISL club FC Goa a zawm. Champion thei dinhmuna la ding Aizawl FC chuan league match vawi 10-ah vawi khat chiah chak hmel an hmuh zui avangin an nomawi an chan.

MK-a'n FC Goa-ah hmun a chan loh avangin Mizo club hi loan-in a zawm leh a, AFC Cup-ah a inlan theih loh avangin Super Cup hi a rawn khelh lehna hmasa ber a ni a, coach Santosh Kashyap-a'n defensive game a khelh avangin bench-ah a awm hmasa phawt.

Khelmuala a luh hnuah MK-a a nung a, danglamna a thlenna tak erawh penalty a ni. Bawngkawn tlangval kutah Mizo club hmalam hun a awm a, player tam tak zamna hmunah 'panenka' in la a pet ngam. Inelna satliah a ni lo a, AIFF Super Cup-ah ISL champion Chennaiyin an hmachhawn a, keeper Karanjit Singh chu India ram keeper zinga tawnhriat nei ṭha ber zinga mi a ni.

MK-a'n goal laiah a chip a, keeper Karanjit erawh a dive hman a, zawi muangin goal-ah a lut. Hetiang hian 2006 FIFA World Cup final-ah Zinedine Zidane chuan Gigi Buffon-a venah a pet tawh a, khawvelin French midfielder hi an dah sang. Bawngkawn tlangval hian India ram inelna sangah a pet leh a, a goal bawk avangin India ramah chuan dah san loh chi a ni lo, chutihrualin MK-a tan erawh thil thar a ni lo–MPL6 semifinal-ah khan Santosh Trophy-a Mizoram keeper Lalṭanpuia bum nan leh Aizawl FC final luh nan 'panenka' hi a lo hmang tawh bawk a ni.