Parker aia lian zawk Joshua

Anthony Joshua chuan WBA, IBF leh WBO world heavyweight title liantham pathum kawl kim vek turin Pathianni zing khan Joseph Parker chu unanimous points (118-110 118-110 119-109)-in a hneh a, vawi 21 inhnek a hmachhawnah vawi 21 hnehna a chang ta.

Principality Stadium, Cardiff khawpuia inhnek hi mipui 78,000 velin a hmunah an en a, ṭantu ngah Joshua-a'n beisei ang ngeiin hnehna a chang. Inhnek zawh hnuah British boxer a ṭawng pawr nghal a, Parker nena an inbeihna chu 'a thiam zawk' zawnna a nih thu a sawi.

Joshua chuan, "Parker-a'n 'indona' a beisei thu a sawi a, mah se vawiina kan inhnek hi 'tu nge thiam zawk' tih zawnna a ni–champion turin eng nge tih ngai ka hria," a ti a, "Deontay Wilder emaw Tyson Fury hmachhawn ka duh. Wilder hi min pe ula, ka tukdawl nghal ang," a ti zui.

Britain boxer hian WBC heavyweight champion Deontay Wilder hi a hmachhawna a hneh a nih chuan boxing chanchina heavyweight title pali kawl vek thei hmasa ber a ni ang.

Joshua chuan, "Ka kawnghren zawng zawng hi han en teh u. Wilder nen hian kan inhmachhawn dawn a nih chuan inbiaknaah a thu ber ka nih a ṭul ang," a ti a, dinhmun ṭha zawk a nih avangin a inti 'thu' hle.

Hetihlai hian Joshua ngam lotu Parker chuan, "Inchhirna engmah ka nei lo. Tun aia ṭha zawka lo kir leh turin theihtawp kan chhuah ang a, Joshua hmachhawn leh hi ka duh. Vawiinah erawh Joshua kha a ṭha zawk a ni a, mah se kan lo kir leh ang," a ti.