Santosh Trophy ; Mizoram laka vannei Kerala an champion

Santosh Trophy-a record nei ṭha lawr lak West Bengal-in an stadium chhuan tawlawl Salt Lake Stadium-ah nomawi chawi tum mah se, Kerala-in an beisei an tihtawp sak.

Nimin tlai final-ah hian Kerala-in Jithin MS hmangin minute 18-naah hma an hruai a, West Bengal-in captain Jiten Murmu hmangin minute 68-naah an sut. Hun pangngaiah 1-1 in an hnehtawk a, minute 117-naah defender Vibin Thomas-a'n tauh lut mah se Bengal-in injury time-ah Tirthankar Sakar freekick hmangin an sut. Penalty-ah Kerala keeper Midhun-a a che ṭha a, 4-2 in mikhual an chak.

Semi final-a Mizoram hnehtu Kerala hian kum 2005 hnuah a vawi khat nan nomawi an chawi a, champion tur hian inelna thlengtu leh champion lai West Bengal an hneh avangin an nomawi hi a hlu bik a, tun hi an vawi ruk champion-na chiah a ni bawk.

Minute 90 chu
Kerala-in hun chanve hma lam thununin Jithin MS chuan minute 18-naah a khung a, tun inelnaa a goal ngana chiah a ni.

Bengal lamin an nawr let a, mualneitu an nih bawk avangin second half chinah chuan inkhel an thunun tawh hle. Minute 68-naah substitute Rajon Barman-a cross chu tun inelna hmang ṭha Jiten Murmu chuan ṭha taka a lak hnuah siphurh sut nan a hmang.

Kerala-in khung belh tum loin goal venhim hna an chhunzawm a, Bengal-in nawr viau mah se hun pangngnaiah goal a luh belh lo.

Red card leh goal
Bengal-in extra time an thunun a, goal khung erawh an harsat thung. Minute 111-naah Braman-a'n amah ang bawka substitute Sandip Bhattacharjee hnen aṭanga a ball hmuh chu pet goal a tumna lamah Kerala keeper Midhun V tlawh fuhin referee-in red card a pe.

Kerala-in an tamna an hmang ṭangkai zui a, vei lam aṭanga Jestin George-a cross chu Vibin-a'n a tauh lut a, goal luh hun hi minute 117-na a ni. Kerala an chak ngei tura a lan hnuah, injury time minute linaah Tirthankar Sakar chuan freekick aṭangin a khung - semifinal-a Karnataka an hneh ṭuma injury time-ah freekick aṭang thoa khungtu kha a ni - penalty hmanga ṭhum vawr a ngai ta.

A changtupa Midhun
Penalty an pet a, Kerala keeper Midhun chuan Bengal tana pettu hmasa pahnih Ankit Mukherjee leh Nabi Hussain Khan-te a dan sak nghal a; Tirthankar Sankar leh Sanchayan Samadder te erawhin Bengal tan goal an khung.

Kerala lam tana pettu Rahul V Raj, Jithin Gopalan leh Jestin George ten an pet goal vek. West Bengal lamin vanneih beiseiin keeper Ranjit Majumder aiah captain Jiten Murmu an ventir a, amaherawhchu Kerala aiawha pettu Seesan S a buai phah lo a, chiang takin chakna a goal khung a, penalty-ah 4-2 in an chak.

Thlirna Tawi
Kerala 2 - 2 West Bengal
KER : Jithin M.S 18'; Vibin Thomas 117'
WB : Jiten Murmu 68'; Tirthankar Sakar 124'
Penalty Shootout-ah Kerala 4-2 in an chak