Man City tan United hneh a tawk

Manchester City chuan April 8 zana an mikhual tur Manchester United an hneh a nih chuan, Etihad Stadium-ah ngei Premier League champion an ni tawh dawn. Pep Guardiola naute hian Match 31 aṭangin point 84 an hmu tawh a, pahnihna United aiin point 16 zetin an sang fal tawh zawk.

Inrinni zan inkhelah Man City-in khual­mualah Everton chu 3-1 in an luhchhuh a, inkhel dangah Jose Mourinho enkawl Man Unted pawhin an mikhual Swansea lakah si hnih faiin hnehna an chang ve bawk a ni.

Vawi khat
Pep Guardiola-a'n Goodison Park-ah a naute vawi thum a lenluh pui tawhah hnehna a la chang lo a, tun ṭumah erawh thawnthu a danglam ta. Minute lina lekah David Silva cross ball chu winger Leroy Sane-a'n boruaka a kan laiin a hlap lut.

Spain international Silva-a'n Raheem Sterling goal khung tur a siamsak kar lakah, midfielder Kevin de Bruyne thawhrah sengin striker Gabriel Jesus-a'n a tauh lut ve bawk. Everton tana Yannick Bolasie goal khungin awmzia a nei ve tawh lo.

Barcelona manager hlui Pep-a'n Everton khelmualah a vawi khat nan hnehna a chang a, City tana a nomawi pahnihna leh league title hmasa ber la turin match khat bak chak a mamawh tawh lo bawk.

City manager Pep chuan, "Chawlh kar thum chawlh hnuah ṭha takin kan inlan leh nghal thei, a bik takin Goodison Park leh Anfield-ah chuan ball kan hloh nasa a nih chuan point hmuh a harsa, vawiinah erawh kan zir angin kan khel thei a ni," a ti a, champion an hnaih tawh thu a sawi bawk.

Lukaku goal 100
Romelu Lukaku-a'n Swansea lakah goal hmahruai khungin Premier League goal 100 a tlin ta. Kum 24 mi Lukaku hi goal 100 khung tling thei pangana niin, English mi ni lo zingah hetiang mellung pawimawh phun thei naupang ber a ni bawk.

Old Trafford-ah Arsenal forward hlui Alexis Sanchez-a'n Lukaku goal khung tur a siamsak bakah, United tana a league goal hnihna a khung bawk. Inkhel thununtu United tan keeper David de Gea chuan forward Tammy Abraham goal khung tur ṭha zetin vawi hnih a dan sak.

Chelsea, West Brom leh Everton tan pawha khel tawh Lukaku chuan, "Kum ruk mi lek ka nih lai aṭanga ka khelh châkna hmuna goal 100 khung tlin hi a lawmawm a, duhthusam a thleng dik a ni," tiin a goal 100 khung chungchang a sawi.