Messi a awm; thlaphang suh u!

Barcelona-in Lionel Messi an nei miau a, Sevilla-in October 2015 hnua a vawi khat nan Catalan club an hneh ve dawn niin lang hman mah se a tawpah Messi an ngam lo.

Sevilla hian minute 87 thleng chu 2-0 in hma an hruai a, Suarez-a'n minute 88-naa an siphurh a sut ṭhen pawhin dinhmun ṭha zawk an la ni–mahse minute khat pawh a liam hman hmain Messi chuan si phurh sut zawh nan goal ropui a khung a, team pahnih hi 2-2 in an ṭin.

Real Madrid boss Zinedine Zidane-a'n an thiampuipa Cristiano Ronaldo chawlh hahdamtir a thlan zanah Gareth Bale-a'n zo takin mawhphurhna a la a, 3-0 a Las Palmas an hnehna inkhelah goal hnih a khung.

Comeback ropui chu
April 21-a Copa del Rey final khelh turah Sevilla leh Barcelona an intawng dawn a, Sevilla-in Spnaish Cup nomawi chawi an tumna kawnga rilru huaisen an put lawk theih nan Barcelona lo hneh lawk chu an tan hna pawimawh a ni tih an hria.

Mualneitu Sevilla-in minute 36-naah Franco Vazquez hmangin goal hmahruai an khung a, Barcelona-in an sut mai tura ngaih a nih laiin minute 50-naah Luis Muriel chuan Sevilla hmahruaina a belhchhah zawk.

Barcelona boss Ernesto Valverde-a'n hnehna chang turin Messi a mamawh tih a inhria a, malpui hliam vanga chawlh hahdamtir player hi minute 58-naah luhtir a ni–Argentina captain luh hnuah Barca goal nawr a na sawt a, Suarez leh Messi ten si phurh an sut zo.

Messi a la dam lo!
Barca coach Valverde chuan, "Messi kha khelhtir ka tum sa hrim hrim. Leo hian hliam a la nei ngei a, dam chiang var a la ni lo. Mahse, match fitness nei turin inkhel se ka duh si a ni," tiin risk an lak thu a sawi.

Barcelona hian Nilaini zanah Champions League quarterfinal first leg khel turin Roma an mikhual dawn a, Valverde chuan, "Hetih hunah chuan a dam chian hman kan beisei," tiin Messi-a'n Italian club a hmachhawn theih tur thu a sawi.

Catalan club hian league match 30 chhung chu tlawm hmel an hmu tawh lo a, nizana inkhel pahnihna Atletico Madrid aia an sanna chu point 12 a ni–nizan inkhel result a zirin an inthlauhna erawh a la danglam leh thei thung. Valverde chuan, "Kan la champion lo. Chuvang tak chuan Sevilla lakah pawh khan a tawp thleng kan bei a ni," a ti.

Ronaldo aiah Bale
Zidane-a'n Thawhlehni zana Juventus nena Champions League quarterfinal an khelh tur rilruah a dah a, French manager hian Ronaldo leh captain Sergio Ramos chu Las Palmas nena an inkhelah squad-ah pawh a dah lo.

Mahse, player langsar pahnih awm lo mah se Real tan buaina tur a awm lo. Gareth Bale chuan minute 26-na lekah goal hmahruai a khung a, minute 39-naah Karim Benzema chuan penalty hmangin a chhunzawm ve leh bawk.

Team pahnih khelh dan thlirin Las Palmas an tho dawn lo tih a chiang a, minute 51-naah mikhual team Real-in penalty an hmu nawn–a pet turin Bale a pen chhuak a, Welsh forward hian tun season-a ram leh club tana a goal 17-na ni turin a khung.

Bale a chiang lo
Hliam vangin Gareth Bale a buai reng a, Zidane-a lakah a tla tlum tawk lo niin a lang bawk. French manager-in chance a pekah erawh Welsh forward a talbuai lo a, player ṭha a nihzia a pholang ṭhin. Hetichung hian Zidane chuan a player chu Juventus hmachhawn tur chiangah a tel loh thu a sawi.

Real Madrid boss chuan, "Bale a khelh dan khan minti lawm a, Thawhlehni zana a inkhelh dawn leh dawn loh erawh ka sawi lawk thei lo, in nghah ve phawt a ngai ang," a ti!

Season hmasaa Champions League leh La Liga nomawi chawi kawp team hian tun season-ah European club te inelna sang bera nomawi bak hi beisei theih an nei tawh lo a, Zidane-a ṭawng fimkhur viau hi thil awm lo a ni lo.