A zawna vawi nga champion PSG

Paris St-Germain chuan AS Moanco 3-0 a hnehin tun season chhunga an nomawi hmasa ber ni turin French League Cup an chawi ta, he inelna bikah hian tun hnai season li chhung an champion tawh.

Inrinni zana final khelhah PSG tan Edinson Cavani chuan minute riatna lekah penalty

aṭangin goal hmahruai a khung a, hun tawp hma minute nga chauh a awm tawh tihah a goal hnihna a khung bawk. Uruguay international striker-in goal hnih a khung inkarah hian winger Angel di Maria chuan goal khat a thawh ve bawk.

Ligue 1 champion AS Monaco tan captain Radamel Falcao-a tauh goal chu video assistant referee (VAR) hman a nih hnuah pawm a ni lo a, Colombia international hian hun ṭha nei nawn leh mah se PSG keeper Kevin Trapp a paltlang thei lo.

PSG an lian
Arab sum hmanga an insiam len hnuah PSG hian French football an thunun hneh hle, tun hnai season nga chhungin domestic trophy lak theih 13 zinga 11 zet an chawi a, season li chhung a vawi thum nan nomawi pathum chawi rual an beisei mek.

Unai Emery naute hi league champion lai Monaco aiin point 17 zetin an sang fal tawh a, French Cup semifinal lut tawh bawkin Caen nen 1-1 in an inhnehtawk, second leg khelh leh tur a la nih avangin tlang tura ngaih an ni.

Champions League aṭanga an tlak avangin PSG manager dinhmun a derthawng nia sawi a ni a, mahse Emery chuan Paris Saint-Germain president Nasser Al-Khelaifi hnen aṭanga thlawpna an neih ṭhat thu a sawi.

Sevilla manager hlui Emery chuan, "Monaco hi khingpui awlsam an ni ngai lo, goal ruk vel lai khung theihna hun ṭha kan insiam thei kha a ropui hle. Kan duh ber chu nomawi chawi a ni a, kan ti hlawhtling thei. Season a la tawp lo a, hmabak lian tak pahnih kan la nei, club thuneitu lam aṭanga thlawpna kan dawn ṭhat avangin huaisen takin kan kal zel ang," tiin a sawi.