Bayern Munich tan vawi khat chak a tawk

Bayern Munich chuan Bundesliga nomawi an kawl lai humhim turin match khat chak bak an mamawh tawh lo. Inrinni zan khan Bayern hian an elpui Borussia Dortmund chu 6-0 ngawtin an sawp a, match 28 aṭangin point 69 an hmu tawh.

Der Klassiker (German Clasico) inkhelah Robert Lewandowski chuan a club hlui lakah hattrick a siam a, Bayern tan hian tun hnaia khel ṭha thei tak Thomas Muller, James Rodriguez leh Franck Ribery ten goal khat ṭheuh an khung ve bawk.

Dortmund lamin a chhanletna an nei lo a, table-ah pathumna nih chhunzawmin Bayern Munich nen an inkarah hian point 21 zet an awm tawh thung–pahnihna Schalke an phak lohna chu point li a ni bawk.

Germany international Mats Hummels chuan, "Dortmund tana ka khelh laiin he hmunah hian kan tlawm tawh a, a nat zia ka hria. Ka ṭhian leh inkhelh pui ṭhin tam tak an la awm a, season tharah chuan beiseina sang tak nen an inlan chhunzawm ka duhsak," tiin a club hlui an hneh hnuah a sawi.

Bayern defender chuan sawi zawmin, "International break neih hnua inkhelh hi chu a awlsam ngai lo a, vawiin kha chuan minute 90 chhung ṭha takin kan khel a ni, a bik takin first half chhung khan kan khel ṭha takzet," a ti.

Heynckes tan
Jupp Heynckes kaihhruaina hnuaia indin thar Bayern hian April 7 zanah Augsburg an hmachhawn leh dawn a, hnehna an chang a nih chuan nomawi an chawi tawh dawn. German manager hian league nomawi a chawi hmasak ber aṭanga a kum 29-naah a vawi ruk nan a chawi leh dawn ngei niin a lang ta.

Kum 72 mi Heynckes hian Bayern Munich hi ṭum thum a enkawlna a ni tawh a, tun season-ah a champion leh a nih chuan Bundesliga title vawi ruk a lakpuina tur chiah a ni ang. A vawi hnih nana Champions League nomawi chawi tur pawhin beiseina an nei mek; Thawhlehni zan hian Spanish club Sevilla nen quarterfinal first leg an khel ang.