PSG leh Messi bakah Man City leh Pep fiahin an awm dawn

Lionel Messi telna Paris Saint-Germain chuan zanin dar 12:30 hian Club Brugge an hmachhawn dawn a, Argentina captain vangin Champions League inkhel ngaihven hlawh a ni dawn. Group A inkhel dangah Pep Guardiola kaihhruai Manchester City-in RB Leipzig an mikhual bawk ang.

Champions League-ah hian group khata a sang pahnihin knockout stage an lut dawn. German club ṭha RB Leipzig hi season liam taa Manchester United pet chhuaktu an ni a, PSG leh Man City te pawh vanduai thei an ni.

PSG leh UCL
Qatar Sports Investments-in kum 2011 khan PSG an lei a, French club ṭha pangngai chu Europe club ṭha zinga chhiar tel tura thuam ṭhat an tum. Qatari mi hausa Nasser Al-Khelaifi ten PSG an lei hian French club hian Europa League an khel a, season sarih chhung Champions League an khelh lohna a ni bawk.

Sum hmangin PSG an chei ṭha a, season tinin Champions League an khel tawh. Hlawhtlinna an chan theih nan coach pawh an thlak ngun, Mauricio Pochettino an rawih hma hian Carlo Ancelotti, Laurent Blanc, Unai Emery leh Thomas Tuchel te an chhawr tawh a ni.

Amaherawhchu PSG hian group stage paltlang ziah mah se stage sangah beisei an pha ṭhin lo a, last 16 leh quarterfinal chu an tlin tawk ni ber.

French club hian player ṭha bik an mamawh tih hriatin sum ṭhahnem tak sengin Neymar leh Kylian Mbappe te an lalut a, 2019–20 season-ah Tuchel-a hoin final an thleng a, season liam ta pawhin semifinal an thleng. Mahse nomawi an la chawi thei tlat lo.

Mamawh chhanna Messi?
PSG-in neih loh an la nei a, khawvela player ṭha bera mi ṭhahnem takin an chhal Messi an chang thei hlauh. Sum vanga Barcelona tla chhia vanneihpuitu chu PSG an nei a, Argentina captain an neih tak avangin team boruak pawh a nung thar hle.

French club hian tlarhmaah khawvel player ṭha pathum Messi, Neymar leh Mbappe te an tlar thei dawn tihna a ni a, khingpui defender-te tan chuan an hming ringawt pawh hi zamna tham a ni.

Messi hi mamawh chhanna a ni em tih chu hunin a la hril dawn. Champions League nomawi vawi li chawi tawh Messi hian Europe-a club inelna sang bera nomawi a chawi hnuhnun ber chu kum 2015 daih tawh kha a ni a, hemi hnu hian ṭum khat chiah semifinal a thleng.

Chutihrualin an champion ṭuma Barca tlarhmaa awm chu MSN - Messi, Suarez, Neymar te an ni a, PSG-ah Messi leh Neymar te an inkawp leh dawn a, Suarez aiin Mbappe a awm thung ang. Khawvelin MNM - Messi, Neymar, Mbappe a hmu châk ta hle.

UCL pual Messi
Lionel Messi hian August 10 khan PSG hi a zawm tawh a, French club hian match li an khel leh tawh chungin Argentine forward hi match khat chiah a la inlan. PSG-in Reims 2-0 a an hneh ṭumin Messi hian minute 65-naah Neymar a thlak.

Kartawp khan PSG hian Clermont Foot 4-0 an hneh a, Messi bakah South American player dangte an chlawhtir an ni. French club inkhelh hun hi Inrinni zan a ni a, South America lamah Zirtawpni zingah World Cup qualifier khelh a nih avangin Messi, Angel di Maria, Leandro Paredes leh Neymar te an let hman lo. Hetihlai hian Brazilian defender Marquinhos erawhin ram tana match hnuhnung ber khel loin PSG tan a inlan thung.

PSG hian kartawp hian Ligue 1 nomawi chuhpuitu thei zinga mi Lyon an hmachhawn dawn a, manager Mauricio Pochettino pawhin player ṭhenkhat hi chu a la hahdamtir chhunzawm a rinawm. Chutihrualin erawh player ṭha ber nih duh Messi tan erawh awl reng a thiang lo a, a elpui Cristiano Ronaldo-a'n Premier League lamah ropui taka bul a ṭan avangin Champions League-a bul ṭan ṭhat a mamawh.

PSG boss Poch chuan, "Messi hi kan zinga a rawn awm aṭangin a insiamrem awlsam em em a, training-naah pawh a che ṭha. A ṭhat theih dan ber angin an khel chhuak ang. Amah hi ka dahsanna a rei tawh a, Rosario chhuak ve ve kan nih bakah Newell's Old Boys ṭantu ve ve kan ni bawk. Kan pahnihin club duhthusam hi kan tih hlawhtlin theih ngei ka beisei," tiin a sawi.

French club khingpui tur Club Brugge hi Jupiler Pro League hmahruaitu ni mah se PSG nena khaikhin chi rual an ni lo a, chutihrualin minute 90 chhung chuan engpawh a thleng thei a ni thung.

Man City leh Pep
Manchester City-in Champions League final an lut a, rinkai ni chunga Chelsea an hneh loh avangin an la na hle. Club chairman Sheikh Mansour chuan striker lak nan sum an thehchhuah tur thu a sawi a, vanduaithlak takin sumin Harry Kane a lei thei lo. Chutihrualin pound maktaduai 100-in Jack Grealish an lalut a, Sergio Aguero thlakna tak an la lo chungin champion ngei an tum.

Manager ṭha bik Pep Guardiola hian Barcelona a enkawl laiin Champions League nomawi ṭum hnih chawi tawh mah se kum 2011-a UCL nomawi a chawi hnua a thlen san leh ber chu season liam taa final an thlen kha a ni.

Spanish manager hian a hun ṭha a bawhpelh avangin tun season-ah nomawi chawi a har lehzual dawn. PSG-in Messi an lakluh bakah Manchester United-in Cristiano Ronaldo an lalet a, Chelsea an inthuam ṭha a, Bayern Munich, Real Madrid leh Europe club ṭha an kat nuk avangin Man City hmabak hi a hautak hle.

Man City hian zanin RB Leipzig an hmachhawn dawn a, en a châkawm. Chutihrualin football ngainatute en châk erawh September 28 zana Man City leh PSG inkhel tur a ni.

Zanin Inkhel Tur
Besiktas 10:15 PM Borussia Dortmund
Sheriff 10:15 PM Shakhtar Donetsk
Manchester City 12:30 AM RB Leipzig
Club Brugge 12:30 AM PSG
Atletico Madrid 12:30 AM Porto
Liverpool 12:30 AM AC Milan
Sporting Lisbon 12:30 AM Ajax
Inter Milan 12:30 AM Real Madrid