Pele a ṭha zel

Brazilian football legend Pele chu ICU chhuahsan thei dinmuna a din tawh thu a fanu Kely Nascimento-i'n Thawhṭanni khan a sawi. Kum 80 mi Pele hi a rila bawk awm vangin September 4, Inrinni khan Sao Paulo damdawi inah an zai a ni.

Pele fanu Kely chuan, "Ka pain hma a sawn zel a, na a nei tawh lo. Amah pawh a hlim a, a lungawi lohna awmchhun chu a duh duh ei an la phal lo hi a ni tawh mai. Ni hnih khat hnuah damdawi in room pangngaiah dah a ni ang a, chumi zawh chuan in lamah a enkawl theih ang," tiin instagram-ah a ziak.

Tun hnaiah Pele hriselna hi a pan ve hle. Kum 2015 thla ruk chhunga damdawi inah ṭum hnih a luh avangin a kap bawr zai a ni a, kum 2019 khan zun kawngah harsatnaa neih avangin zai a ni leh bawk.

February 2020 khan Pele fapa Santos goalkeeper hlui Edinho chuan a pa chu puitu tel loa a kal theih loh avangin an chenna in chhuahsan hrehawm a tih thu a sawi tawh.

Guinness Book of World Records-a tarlan danin Pele hian match 1,363-ah goal 1,279 a khung a, chung zingah chuan ram tana match 91-a goal 77 a khung pawh a tel a ni.