Mizoram aiawhten Karnataka an thleng

Mizoram boxing team chuan 5th Elite Men's National Boxing Championship an hmachhawnna tur hmun Inspire Institute of Sport, Karnataka chu Thawhṭanni khan an thleng. Boxing Federation of India (BFI) buatsaih inelna hi vawiin aṭangin khelh ṭan tur a ni a, September 22, 2021-ah zawh a ni ang.

Mizoram coach R. Lalchhuanawma (Sete) chuan, "Pathian zarah kan hun tlem neih kan hmang ṭha a, kan boxer-te an thawkrim a, an fitness a ṭhat avangin beisei pawh kan nei sang. Mizo mipuite ṭawngṭainaa min hre ve reng turin kan ngen a ni," tiin Vanglaini a hrilh.

National Boxing C'ship-ah hian category 13 a awm a, Mizoram hi category pangaah an tel dawn. Mizoram aiawh tura thlanchhuahte chu Lallawmawma (57kg), Zomuansanga (67kg), Zochhuanawma (71kg), Malsawmtluanga (75kg) leh C. Lalduhawma (81kg) te an ni.

Nizan khan tie draw neih a ni a, he thuziah lai hian vawiina Mizo boxer-te khingpui tur hi kan hre hman lo.