San Siro-ah Carlo Ancelotti kir dawn Inter Milan mualah UCL awptu Real
Champions League tih leh Real Madrid a inzawm nghet viau a, an manager Carlo Ancelotti hming leh UCL pawhin inzawmna thuk tak an nei - Ancelotti enkawl Real hmachhawn hi thil châkawm lo tak a ni ang.
Inter Milan chuan zanin dar 12:30 hian Champions League group match khel turin Real Madrid hi an lo mikhual dawn. San Siro-ah fans an pun khawm theih dawn avangin inkhel boruak sang leh hmuhnawm a nih ngei a rinawm.
UCL leh Real
European club ṭhate inelna a nih avangin a khelh phak pawh a harsa, inlan phak awlsam lohzia hrechiangtute chu Arsenal ṭantute an ni. Khelh phak ringawt pawh a harsat laiin Real Madrid chu vawi 13 teh meuh an champion tawh.
Zinedine Zidane-a'n player a nih lai leh coach a nih hnuah ropui takin UCL-ah Real Madrid a inlanpui. Tunah chuan Zidane hun a liam tawh a, a player hman thiam chungchuang Cristiano Ronaldo pawh Juventus hnuah Manchester United lamah a kir leh tawh zawk.
Zidane awm tawh lo mah se Real hian Ancelotti an nei. Italian manager hian Real bakah AC Milan chu Champions League nomawi a chawipui tawh, khawvel football manager piang tawh zingah mi pathum chiahin UCL nomawi hi vawi thum an la chawi, an zinga pakhat chu Ancelotti hi a ni.
Italian manager hian tun hmain Milan a enkawl tawh ṭhin a, hlawhtlinna hrang hrang a chang tawh. Zanina an inkhelhna tur San Siro boruak hrechiangtu a ni a, boruak sang leh inkhel hautak hmachhawn dan a thiam tawhna chu a ṭangkai thei ang.
Real an ṭha?
Season hmasa khan Real Madrid hian La Liga lamah Atletico Madrid an tluk lo a, Champions League-ah Chelsea hneh loin an tla. Blues an ngam loh dan hian sawi zui a hlawh, kawng engkimah English club an khan lo a ni ber.
Hripui leng vangin Real hian an duh ang player an lalut pawp pawp thei ngawt bik lo. Captain Sergio Ramos an chelh theih loh bakah Raphael Varane a chhuak bawk, man nei loin David Alaba an nei thung - Bayern Munich defender thar hian Inter a hmachhawn thei ang.
Kylian Mbappe la thei lo mah se Karim Benzema an la nei. Manager Ancelotti chuan, "Ani hi chuan season khatah goal 30 ni loin, goal 50 khung tur a ni," tiin a striker a dah san thu a lo sawi tawh. France international hian tun season-ah match li aṭangin goal nga a khung; Inter tlarhnung tan ven uluk a ngai dawn.
Luka Modric, Eden Hazard, Casemiro bakah Vinicius Jr te an neih avangin, forward Gareth Bale leh midfielder pawimawh Toni Kroos te an la chhawr thei lo a nih pawhin buaina an nei lo tura ngaih a ni, chak tum ngam turin an la ṭha tawk.
Conte-a kalsan
Antonio Conte-a'n season hnih chhungin Inter Milan hi Serie A nomawi chawi thei team-ah a hlangkai. Mahse, Italian manager hian Champions League lamah erawh beisei ang result a neihpui lo, group stage pawh paltlang zo loin an tla - an tluk loh chu Real Madrid hi an ni.
Conte a chhuak a, tunah chuan Simone Inzaghi hun a ni tawh. Inzaghi-a'n striker ṭha ber Romelu Lukaku leh defender pawimawh Achraf Hakimi chan mah se league-ah chuan ṭha takin season bul an ṭan thei, champion nawn an tum ngam dawn.
Nerazzurri hian UCL lama an record ṭha lo tak thai reh tur erawh chuan insiamṭhat an mamawh, European football inelna sangah hian an match hnuhnung 16 zinga pathumah chiah hnehna an chang - khelh ṭhat ringawt a tawk dawn lo, chak an tum a ngai ang.
Inzaghi naute hi a zawna match thum an chak hnuah Sampdoria nen an inhnehtawk hlim a ni a, player thar - defender Denzel Dumfries, striker Edin Dzeko leh midfielder Hakan Calhanoglu te hi eng ang taka rintlak nge an nih dawn tih chu Real Madrid lakah kan hmu dawn.