Benitez hoin Everton an sang zel

Liverpool fan-te ngaihsan rawn Rafael Benitez chu an hmelma kumhlun Everton siam liantuah a ṭang a, Spanish coach enkawlna hnuaiah Merseyside club an la tlawm lo.

Thawhṭanni zan khan Everton chuan Premier League match-ah an mikhual Burnley chu 3-1 in an hneh a, mikhual team tan Ben Mee chuan goal khung hmasa mah se Everton tan Michael Keane, Andros Townsend leh Demarai Gray ten an chhanglet a, a tawpah an chak.

Everton-in hnehna an chan leh tak avangin table chung lamah Manchester United, Chelsea leh Liverpool te nen an awm ho a, match li an khelhah point 10 an nei ve ta - transfer bazar-a sum an hman tlem ber ṭumah an result a duhawm hle.

Hetihlai hian Burnley erawh league match li an khelh tawhah chak an la nei lo a, table-ah 18-na niin point khat nen an awm mek - season ṭan dan duhawm lo tak a ni.

Barakhaih!
Goodison Park-a inkhelah first half chhungin goal a lut lo a, hliam vanga thla khat bawr vel chawl tur Dominic Calvert-Lewin tel loin Everton tlarhma an hriam tawk lo niin a lang.

Second half-ah pawh Burnley lamin goal an rawn khung hmasa zawk a, minute 53-naah Ben Mee chuan goal hmahruai a rawn khung. Goodison Park a reh a, mahni muala tlawm thei dinhmunah Everton an ding.

Mahse, Everton an ngawi rei lo. Goal an chhuah aṭanga minute sarihnaah Keane chuan Townsend-a siamsak aṭanga ball kal chu si phurh sut nan a tauh lut a, 1-1 a ni.

Minute nga a liam a, Townsend bawk kan hmu - English winger hian tun ṭumah erawh a ṭhiante khung tur siamsak loin an hmahruaina goal a khung a, goal mawi bik a ni.

Everton lawmna
Goal an chhuah aṭanga minute 12 chhungin Everton-in hma an hruai der a, an la duhtawk lo cheu. Abdoulaye Doucoure-a ball pek ṭha tak chu Demarai Gray-a'n an goal thumnaah a chantir a, 3-1 in Everton an chak.

Kum 25 mi Gray hian nipui transfer khan Bayer Leverkusen aṭangin Everton hi pound maktaduai 1.7-in a zawm a, league match li a khelhah goal thum a khung tling ta der!

Townsend-a'n free transfer-a Everton a zawm khan kum 30 a ni ve tawh a, a lakah fan-ten beisei san an harsat. Mahse, Benitez-a hnuaia Newcastle United-a lo khel tawh winger hian khelmualah ringhleltute a chhang a, league match liah goal khat khungin assist vawi hnih a nei ta.

Nikum lama pound maktaduai 20-a Everton zawmtu Doucouré pawh Benitez-a hnuaiah a man phuin a khel chhuak ve ta a, league match liah goal khat khungin assist vawi thum a nei tawh.

Inkhel hmuhnawm
Goodison Park-ah inkhel a hmuhnawm a, Mee laka a chet dan avanga Richarlison hrem a ni lo chu a mak a, Burnley defender James Tarkowski-a'n Brazilian forward laka a foul avanga card a hmu lo chu thilmak a ni bawk - referee Martin Atkinson chuan foul-ah pawh a ngai lo!

Second half-a an khelh dan avangin Everton-in chak an phu a, chutihrual chuan Burnley fan-te chuan kut ruaka haw an phu bik loah an ngai ve tho ang - chance an nei ve tlat.

Nipui laia Everton nena sawizawm Dwight McNeil chuan Chriss Wood tan chance duhawm a siamsak a, mahse, season hmasa Premier League-a goal 12 khungtu hian a chhawr thei tlat lo.

Mikhual team tan Mee leh Josh Brownhill te pawn chance duhawm an nei ve ve a, mahse, player pahnih hian an hun ṭha neih chu an chhawr thei bik lo a, a tawpah chak phu zawk Everton an chak.

Benitez-a Everton
British Iranian sumdawng hausa Farhad Moshiri-a'n February 2016-a Everton-a 49.9% share a lei hnuah nasa takin sum a seng a, tunah phei chuan 77.2% lai neiin European football-a club langsar pawlah Everton siam a tum.

Mahse, an sum sen leh lakluh a inmil loh avangin financial fair play rules an ngaihtuah tel a ngai a, hei vang hian Benitez-a'n Gray-a man atan pound maktaduai 1.7 a seng tih loh chu player dang pali lakluh nan pawisa sen a nei lo - free transfer vek a ni.

Hetihrual hian Benitez-a lakluh Gray leh Townsend ten Spanish coach rinna chhangletin season duhawm tak an hmang mek a, kum 31 mi striker Salomón Rondón-a'n league match khat chiah a la khel rih thung.

Player dang Asmir Begovic leh Andy Lonergan chu keeper ve ve an ni a, tun season Premier League-ah keeper pahnih an la inlan lo - a tawi zawnga khaikhawm chuan Benitez a la che fuh rih e.