Europe club liante it rawn Haaland

Borussia Dortmund chuan zanin dar 10:00 hian Champions League-ah Besiktas an hmachawh dawn a, group C-ah hian Sporting Lisbon leh Ajax te an awm. Portuguese champion leh Dutch champion te hi zanin dar 12:30 hian Estadio Jose Alvalade-ah an inkhel bawk ang.

Dortmund striker Erling Braut Haaland hi kum 21 mi chauh a ni chungin sulhnu a nei ṭha tawh hle. Norwegian striker hian tun season Bundesliga match li lekah goal nga a khung der tawh a, Haaland hian Champions League match 22-ah goal 24 a khung tawh bawk.

German club hian season liam ta khan quarterfinal-ah Manchester City an hneh lo a, hemi ṭum hian Haaland-a'n goal a khung lo. Dortmund striker hian Man City tiam loin Europe-a club a hmachhawn tawh ho lakah goal a khung vek.

Champions League match hmasa 20-a goal 24 a khung thei hi record ropui taka tling. Tuna UCL-a goal khung tam ber record siamtu Cristiano Ronaldo-a'n match hmasa 20-ah goal khat chauh a khung a; Kylian Mbappe (12), Lionel Messi (8) leh Robert Lewandowski (6) te aiin a record a ṭha vek bawk.

Borussia Dortmund-in Manchester United lakah Jadon Sancho an chan a, Haaland erawh an chelh thung. Real Madrid bakah Europe club lian hoin lak ngei tumin Haaland hi an hel mek a, German club tan nakkum nipui bazarah chelh a harsa ang.