Chelsea striker hlui Demba Ba a chawl

English football-a striker hriat hlawh tak ni ṭhin Demba Ba chuan inkhelh a chawlhsan thu a puang a, Chelsea, Newcastle United leh West Ham striker hlui hi kum 36 mi a ni.

Senegalese striker chuan, "Zinkawng hlimawm tak a ni a, football hian hriatreng tur tam tak min tawntir a ni," a ti a, "Thinlung lawma khat chungin ka chawlh thu ka puang ta," tiin twitter-ah a chawlh thu hi a puang.

Ba hian French fourth division club Rouen-ah a career ṭanin Belgian Pro League club Mouscron, German club Hoffenheim leh West Ham tan a khel zui a, a lar ṭan tak takna chu Newcastle a ni.

January 2011 khan Hammers hi a zawm a, league match 12 lekah goal sarih khungsak mah se an relegate avangin a cham zui duh lo a, Newcastle United a zawm.

Magpies-ah season hnih chhungin match 58-ah goal 29 ngawt a khung a, hetihlaia Newcastle tana Papiss Cissé nena an inkawp chu tun thlenga Magpies ṭantute titi a la tling.

Kum 2012 khan Chelsea zawmin season hnih a khel a, kum 2013 khan Europa League nomawi a chawipui. Kum 2014-a Premier League champion thei dinhmuna ding Liverpool an tum ṭumin Steven Gerrard a tawlhthlu a, Gerrard-a tawlhthluk vanga a goal khung hi Liverpool fan-te chuan an theihnghilh thei lo ang.

Chelsea a chhuahsan hnuah Turkish club Besiktas, Chinese Super League club Shanghai Shenhua, Turkish club Göztepe leh Istanbul Basaksehir tante a khel a, season hmasa khan Lugano tan a khel.

Turkish Super Lig-ah pawh vawi hnih a champion a, Besiktas (2016-17) tana a champion hnuah Istanbul chu 2019-20 season khan a champion pui ve leh a ni.

August thla khan Swiss Super League club Lugano hi a chhuahsan a, club a neih loh reng hnuah inkhelh a chawlhsan thu a puang ta a ni - Senegal tan vawi 22 inlanin goal thum a khung.