Vettel chelh an duh

Formula 1 team Aston Martin chuan an driver Sebastian Vettel chelh an duh thu a sawi a, season tharah pawh world champion vawi li ni tawh hi an kawl chhunzawm ngei pawh a rinawm ta hle.

Red Bull tana hlawhtling taka a tlan hnuah Vettel hian Ferrari a zawm, team hlun leh car nei ṭha zawk tan hian F1 title a la ta miah lo thung. Italian team hian an chelh loh avangin a duh lam a hawi thei a, season ṭan dawn khan Aston Martin hi a zawm.

Aston Martin team neitu Lawrence Stroll chuan, "Sebastian kan nei thei hi kan lawm, nakkum lamah pawh hna kan thawhho chhunzawm theih ngei ka beisei," tiin a sawi a, thutlukna chu German driver kutah a awm tihna a ni.

Car intlansiakna sang ber season kal laiah Vettel hian point 35 chauh a la hmu, championship table-ah 12-na a ni mek - tun season bikah chuan Vettel tan nomawi beisei ngam a ni tawh lo a, a sang thei ang ber thlen erawh a tum ang.