Barcelona striker Braithwaite an zai dawn

Sum vanga talbuai Barcelona-in an sum dinhmun an siam ṭhat mek laiin chanchin lawmawm lo an nei a, an striker Martin Braithwaite chu a khup hliam vangin zai a ni dawn.

Kum 30 mi striker hi an league match hnuhnung bera Getafe (2-1) an hnehna inkhelah a inhliam a, a khup vei lam hliam hi enkawl vat ni mah se a damna tur chuan zai a ngai dawn niin an sawi.

Barcelona chuan, "Braith-waite-a khup vei lam hliam chu enkawlna pangngai pek phawt ni mah se ngai a awh thei lo a, hei vang hian zai a ngai dawn a ni," an ti a, a chawlh rei tur zawng tarlan a la ni lo.

Catalan club hian nipui transfer-a an lakluh Sergio Aguero chu a chawn hliam vangin an la chhawr thei lo a, kum 33 mi striker hi October hma chu khelmualah a kir theih a rinawm loh.

Hetihlai hian Lionel Messi number 10 rochuntu Ansu Fati chu tun season-ah hliam vangin a la inlan lo a, Spain forward hi a khup hliam zai vangin a inenkawl mek.

French forward Ousmane Dembele-a'n Euro 2020-a a inhliam hnuah match a la khel leh lo bawk a, ani pawh hi October thla tawp lamah chuan dam hman tawh tura beisei a ni.

Barcelona hian tun dinhmunah tlarhmaa chhawr theih an neih chu Memphis Depay, kum 18 mi Yusuf Demir leh Sevilla aṭanga lakluh Luuk de Jong te chiah tihna a ni a, Ronald Koeman-a nuih a za rih lo viauin a rinawm.