Chelsea mualah Spurs an chak ta

Tottenham Hotspur chuan kum 28 chhung zet an nghah hnuah Chelsea chu an buzawlah ngei mai an hneh ta. Spurs hian Dele Alli goal hnih hmangin Blues 3-1 in an luhchhuah a, season thara Champions League khel zui thei turin an dinhmun an sawhnghet.

1990 February thla khan Gary Lineker-a tauh luh hmang­in Spurs hian Stamford Bridge-ah 2-1 in hnehna an chang tawh. He mi hnuah vawi 27 lenglut leh tawhin vawi 18 zet an tlawm a, chak an nei miah lo - an record duhawm lo tak hi Mauricio Pochettino hoin an thai chhe ta a ni.

Pathianni zan Premier League inkhelah Chelsea lamin Alvaro Morata hmangin hmahruai mah se, Mauricio Pochettino nauten Christian Eriksen hmanga an sut hnuah Alli-a'n goal hnih a khung belh; point 64 hmuin palina an ni a, pangana Blues aiin point riatin an sang zawk.

Alli goal hnih
Antonio Conte-a'n tun hnaia beisei phak lo Alvaro Morata chungah rinna a nghat ngam a, Spain international hian Stamford Bridge-ah inkhel bul a ṭan. Minute 30-naah Victor Moses-a cross chu Morata hian an hmahruai nan a tauh lut a, tun season bikah a lu hmanga a goal sarih khungna chiah a ni.

Chawlhlawk hma chiahin Poch-a nauten an mamawh chhan­na an hmu, midfielder Eriksen-a'n yard 25 a hla aṭangin Chelsea goal lamah a pet thut a, awmhmun fuh tawk lo Willy Caballero dan phak lohin mawi zetin a pet kum lut.

Second half-ah mikhual bawk an hlauhawm, Eric Dier-a ball vawrh luh dawngtu Alli-a'n ṭha taka a lakthlak hnuah tawih zetin a pet lut nghal; Blues keeper Caballero tan tih theih a awm lo. England international hian buai nuaih karah an goal thumna a khung zui bawk.

Spurs an chungnung
Tottenham thiampuipa Harry Kane chu hliam dam hlim a nih avangin bench-ah ṭhuttir a ni a, tlarhma laiah Son Heung-min dah a ni. Kane a awm loh avangin goal khung kawngah South Korean forward thlawp tura dah Alli leh Christian Eriksen te mawhphurhna a sang zual hle bawk.

Kum 21 mi Alli-a'n a thiam ala theihnghilh lo a, ram tan a inlanna lamah beisei phak lo mah se a hunah tak a inlar leh ta. Premier League bikah nikum January thla hnua a vawi khat nan goal hnih a khung leh a, a goal hnih khung hnuhnunna hi Chelsea lakah bawk a ni.

Denmak international Erik­sen hian tharum ngah lo mah se, ani aia tharum ngah leh lian zawkte chunga awm turin skill a nei. Khelmual lai thununtu a ni a, Cesc Fabregas leh N'Golo Kante te aia a chet ran zawk miau avangin dan theih a ni lo.

Premier League champion tan mahni muala point hloh a thiang tawh lo chungin, winger Willian leh Eden Hazard ten an ball thiamna hmangin bei viau mah se a tawp an thleng thei lo. Wing back Marcos Alonso leh Moses te pawhin Tottenham si ban nghak Hugo Lloris an paltlang thei bik chuang lo a ni.

Poch a lian
London club zingah Arse­nal, Chelsea leh Tottenham te hi a langsar zual an ni a, mah se Spurs hian an elpui club pahnih hi an tluk ngai lo a ni satliah mai lo a, an elphak ngai meuh lo zawk a ni.

Mahse, Pochettino-a'n 2014 aṭangin Tottenham a enkawl ṭan a, Argentine manager hian danglamna a thlen. Player lei nan sum a hman hnem theih loh lai pawhin a neih sa a chher hriamṭha a, a duh anga khel tur player a la khawm thiam bawk.

Season hmasa khan league-ah Chelsea chiah tluk loin, an hmelma Arsenal chungah season an khar. Kuminah pawh Gunners leh Blues chungah kum tawp an hmang ngei dawn niin a lang tawh - London club dangte tan Spurs hi dah hniam ngawt theih an ni tawh bik lo ang.

Kum 46 mi Poch chuan, "A sang pali zinga tel kan tum a, chumi tur chuan point thum hlu tak kan hlawh chhuak. Kum 28 chhung kan nghah tawh a taka a thlen dik theih nana min puitu fans chungah ka lawm hle," a ti.

Conte a buai
Italian manager Conte-a'n a season khatnaah Premier League a chawi nghal a, fak a hlawh. Mahse, Juventus ma­na­ger hlui hi transfer bazar laiin a che ṭha lo a, khelmual chhungah an tuar zui zat.

Chak ngei an ngaih tawhna inkhelah anmahni mualah ngei an tlawm. Chelsea hian point riat zetin Tottenham an phak tawh lo a, league match sarih chiah khelh tur an neih tawh avangin a sang pali zinga tel a harsa tawh khawp ang.

Conte chuan, "Tottenham leh Liverpool te dinhmun a ṭha tawh, chutih rualin keini pawh­in a tawp thlengin kan bei ang, a sang pali zinga tel kan tum dawn a ni," a ti. Blues hian kuminah league match vawi kua an khelh tawhah vawi hnih chiah hnehna an chang thei.