Italian palian vs European palian

Zanin dar 12:15 hian Turin-ah Juventus-in Real Madrid an mikhual dawn a, nikum Champions League final rematch a nih avangin quarterfinal first leg hian ngaihven a hlawh hle.

Juventus captain Gianluigi Buffon hi kum 40 mi a ni tawh a, goalkeeper piang tawha ropui ber zinga mi ni mah se Champions League nomawi a la chawi lo. Zanin inkhel hi Italian keeper hma lam hun hriltu tur a ni.

Palian vs Palian
Italy-ah chuan Juventus elpha reng an awm lo a, Serie A-ah vawi 33 tehmeuh an champion tawh a. Kum 2011 aṭang khan an ram league-ah an la champion chho char char a, kuminah eltu nei ve bawk mah se match 30 an khelh tlin meuh chuan anmahni hnaih bertu Napoli aiin point liin an sang leh tawh.

Juve hian an match hnuhnung berah Pathianni khan tun hnaia harhtharna chang AC Milan chu 3-1 in an hneh leh bawk a, kum zawnin vawi sarih an champion ngei dawn niin a lang.

Real Madrid pawh hi La Liga-ah vawi 33 champion tawh an ni a, Spanish club ropui ber ang hiala chhal theih ni mah se tun hnaia Barcelona an rawn len chhoh avangin tun hnai kum 10 chhung chuan anni aiin Catalan club an champion ngun zawk.

Amaherawhchu, Europe-ah chuan Real aia buk rit an awm lo. Los Blancos hian vawi 12 tehmeuh Champions League-ah an champion tawh a, tun hnai kum li chhungin vawi thum an champion bawk.

Buffon leh Zidane
Cristiano Ronaldo leh Lionel Messi te an intawng fo ang mai hian Buffon leh Real Madrid legend Zinedine Zidane te pawh hi an intawng fo.

Kum 1996 khan Zidane-a'n Turin club hi a zawm a, Parma tan Buffon khel ṭan ve bawkin an intawn hmasak berah French midfielder own goal hmangin Parma an chak. Khawvel keeper manto ber ni turin Italian keeper hian Juve a zawm a, ni nga hnuah Florentino Perez-a'n khawvel player manto ber ni turin July 2001 khan Zidane an la thung a, an khel dun lo tihna a ni.

Kum hnih hnuah Champions League semifinal-ah inhmachhawnin Italian club an chak a, final-ah erawh Juve hian Pathiannia an hneh AC Milan chu penalty-ah an hneh lo. Hei hi final-a Buffon-a chak lohna hmasa ber a ni.

Kum 2005-ah knockout round hmasa berah an intawng a, Juventus bawkin hnehna an chang. Tun thlenga sawi zui hlawh erawh 2006 FIFA World Cup final a ni a, Zidane-a'n hun pangngaiah Panenka penalty hmangin a khung a, amaherawhchu French midfielder hi Marco Materazzi tauh luih vangin hnawhchhuah a ni a, Buffon-a'n World Cup nomawi a chawi ta zawk.

Zidane-a'n football khelh a chawlhsan a, kum 11 hnuah an intawng leh a. French midfielder tih ṭhin kha manager ni tawhin a enkawl Real Madrid chuan Cardiff-ah 4-1 tehmeuhin Juventus an sawp.

Buffon-a tan Champions League final a vawi thum thlenna ni mah se vawi thum a tlawmna a ni thung a, football khelh chawlhsan a tum hnaih tawh avangin tun season hi a hun hnuhnung a ni tawh. Zidane-a tan erawh tun season hi a zawna vawi thum a chawi theihna tur a ni a, Europe inelna lian berin Champions League hming a put hnua kum zawna vawi thum chawi thei hmasa ber nih theihna hun ṭha a ni.

Ronaldo bawk
Club pahnih inkhel a nih dawn avangin player langsar an tam dawn a, chung zingah pawh la langsar larh chu nikum final-a goal hnih khungtu Ronaldo a ni.

Juventus keeper Buffon chuan, "Engkimah a theihna zawng zawng a pe vek a, goal hmaah a hriam a, mi danglam bik a ni. Infiammi a nih vangin hma a sawn zel a, tunah chuan tha khek pawh a thiam tawh. A thil tih leh a sawi apiang a lang tlang a, amah hi a ṭangkai a, ani hi ka ngaihsang a ni," tiin a khingpui tur forward a fak.

Ronaldo hian Juventus vawi nga a hmachhawnah goal sarih a khung a, Portuguese forward hi ven uluk a ṭul ang.

Engtin zel?
Juventus lamin hrem vangin Medhi Benatia leh Miralem Pjanic te an chhawr thei dawn lo a, anni pahnih hi AC Milan an hneh ṭumin inkhel bul an ṭan ve ve.

Real Madrid hian Inrinni khan Las Palmas chu 3-0 in an hneh a, Ronaldo dah ṭhat niin BBC tih hming an phuahna chhan pahnih dang Gareth Bale (2) leh Karim Benzema (1) ten goal an khung ve ve.

Real hian nikum final-ah Juventus hneh mah se 2015 semifinal-ah Italian club hian an pet chhuak a, an chak theihna chhan chu Italian club-in an muala hnehna an chan vang a ni a, zanina an khelhna tur hi Juventus Stadium a ni.

Ticket a zo nghal
Juventus leh Real Madrid inkhel ticket an hralh zo hi thilmak a ni lo a, mipui bengverh zawk erawh an hralh zo hma lutuk hi a ni. Thawhṭanni khan anmahni hun chawhma dar 10:00-ah zawrhchhuah ni a, minute riat chhungin an hralh zo nghal vek.

Ticket hralh zo hma chanchin hi first leg ni loin second leg a la ni cheu a, second leg hi Santiago Bernabeu-ah April 11 zana khelh tur a ni. Italian lam hian mipui 80,000 lenna Bernabeu-ah ticket 4,000 an chang. Zanina an khelhna tur Juventus Stadium-ah erawh Italian club ṭantu an tam thung ang.

Ronaldo leh Record
Cristiano Ronaldo hi UEFA hnuai inelna hrang hranga goal khung tam fal ber a ni a, goal 155 a khung tawh. Hetah hian ram inelna pawh a tel vek avangin Argentina captain Lionel Messi (103) tan tluk phak ngaihna a awm lo a, amah hnaih bertu Raul Gonzalez pawhin inkhel chawlhsanin goal 107 a khung. Real Madrid star hian record ṭhahnem tak a nei a, a record chu han thlir ila.

Club leh mimal
UEFA hnuaia inelnaa goal khung tam ber : 120
UEFA Champions League-a goal khung tam ber : 117
Champions League season khata goal khung tam ber : 17 (2013/14)
Champions League final-a chak ngun ber : 4 ( Iniesta leh Seedorf nen inṭawm)
Champions League final pathuma goal khung thei awmchhun a ni
Champions League group stage match ruka goal khung vek thei awmchhun
Real Madrid tana goal khung tam ber : 443
ESM Golden Shoe award dawng ngun ber : 4 (Messi nen an inṭawm)
UEFA Club Footballer/Best Player/Men's Player awards dawng ngun ber : 4
Ballon d'Or awards dawng ngun ber : 5 (Messi nen an inṭawm)
FIFA best player award dawng ngun ber : 5 (Messi nen an inṭawm)
UEFA.com hmangtute thlan Team of the Year a lang ngun ber : 12 (2004, 2007–2017)

National team
Euro C'ship-a inlan ngun ber : 21
Euro C'ship-a goal khung tam ber : 9 (Michel Platini nen an intluk)
Euro C'ship-a vawi khat aia tam goal thum khung tling thei awmchhun
Qualifying chhiar tela goal khung tam ber : 29
UEFA Euro leh European FIFA world Cup qualifiers-a goal khung tam ber : 50
Portugal tana inlan tam ber : 149
Portugal tana goal khung tam ber : 81 (Ali Daei 109, Ferenc Puskas 84 te chiah a tluk lo)