Arsenal mawina Aubameyang

Pathianni zan Premier League inkhelah Arsenal chuan an mikhual Stoke City chu 3-0 in an sawp, striker thar Pierre-Emerick Aubameyang chuan goal hnih a khung.

Emirates Stadium-ah fans an pungkhawm ṭha tawk lo, result ṭha an neih hleihtheih loh avangin Gunners inkhel entu an tlahniam hle. Minute 45 chhungin Aaron Ramsey-a'n crossbar chungah a pet chhuak tih mai loh chu hun ṭha an nei lo.

Arsenal-in an goal khatna nei turin minute 75 an nghah thlen a ngai, Mesut Ozil-a penalty hlawh chhuah chu Aubameyang-a'n goal-ah chantirin, Gabon interantional hian Ozil-a corner pet aṭanga ball lo kal chu a hlap lut zui a, substitute Alexandre Lacazette-a'n ama penalty hlawh a khung bawk.

Arsene Wenger-a naute hi league table-ah parukna niin, palina Tottenham an phak lohna chu point 13 zet a nih tawh avangin season thara Champions League khel tur chuan Europa League nomawi chawi a ngai tawh. Ningani zan hian quarterfinal khel turin Russian club CSKA Moscow an mikhual ang.

Wenger hian league-ah palina an ni phak dawn tawh lo tih a hai lo a, Europa League a ngaipawimawh zawk tawh. Stoke lakah Petr Cech, Granit Xhaka leh Laurent Koscielny te chu bench lamah a ṭhuttir, senior player ṭhenkhat hian tha tharin CSKA Moscow hmachhawn se a duh vang a ni.

Europa League lamah chuan Dortmund striker hlui Aubameyang chhawr theih a ni dawn lo a, England international Danny Welbeck chiah chhawr tur nei hian khup hliam vanga chawl reng Lacazette an chhawr thei tawh ang.