Joshua leh Wilder inbiak a hnai

Anthony Joshua chuan Pathianni zing khan world heavyweight kawnghren pathum WBO, IBF leh WBA kawl kim vek turin Joseph Parker a hneh a, zawhna awm nghal chu British boxer hian engtikah nge WBC champion Deontay Wilder a hmachhawn ang tih a ni.

Joshua promoter Match­room chairman Barry Hearn chuan, "An­thony Joshua hian Wilder hmachhawn hi a duh takzet a, kuminah ngei hma­chhawn a duh ang," a ti a, vawi 21 in­hnek a hmachhawna chak kim vek Joshua hian dinhmun ṭha zawk a nih avangin Wilder a hmachhawn dawn chuan a 'thu' ber nih a duh thu a lo sawi tawh.

Hearn chuan, "Wilder hian Joshua hmachhawn a duh a nih chuan UK-ah ngei an inhmachhawn a ngaih ka ring. Wilder hian a hriat reng tur chu inhnek a hmachhawna sum a hlawhchhuah ṭhin leh Joshua a hmachhawna a hlawh tur hi a inthlau em em a ni," a ti!

Boxer pahnih hi an inhmachhawn a nih chuan he inhneka chak zawk hi heavyweight title liantham pali kawl thei hmasa ber a ni dawn tihna a ni. Hearn chuan, "Karleh aṭangin inbiakna kan neih ṭan theih ka beisei," a ti a, boxing ngai­natute tan chanchin lawm­awm a ni.