Zverev hnehtu Isner a champion

John Isner chuan Alexan­der Zverev hnehin Miami Open nomawi a chawi. American tlangval Isner tan Masters 1,000 title hmasa ber a ni a, tun kara ranking chhuak tharah a thiam 10 zingah a tel tawh ang.

Pathianni zana final inkhelah Isner hian 6-7 (4-7), 6-4, 6-4 in hnena a chang. Set hmasa ber­ah player pahnih an hlau­thawng tawn a, tie break an khelh hnuah world number 5 Zverev a dingchang.

Feet 6 leh inches 10 zeta sang Isner-a'n a service neih ṭhat a chhawr ṭangkai chho a, set hnih naah a service a hum vek laiin a khingpui service vawi hnih a chhuhsak. Set thumnaah pawh hnunglam hawi tawh loin, a vawi 18 nana aces a siam hnuah hnehna a chang ta a ni.

American tlangval Isner chuan, "Tun tour­nament-a ka match hmasa berah khan hnehna chang turin set thum ka mamawh a, set hloh loa match li ka kaltluan hnuah set thum hmang bawkin hnehna ka chang leh. Rinkai ni lo chungin nomawi ka chawi a, ka tan chuan a hlu takzet a ni," tiin a sawi.

Kum 32 mi Isner hian tun hma lamin Master 1,000 final hi vawi thum a khel tawh a, a chak lo zawkah a ṭang ziah. A ṭum linaah erawh a chung­nung zawkah a ṭang ve ta. Final a luh theih nan hian tun hnaia khel ṭha tluang tak Juan Martin del Potro a hneh bawk.