Indian Super Cup ; Gokulam laka vanneihna mamawh Bengaluru
Bengaluru FC-in qualifier kaltlanga Super Cup khel Gokulam Kerala laka hnehna chang turin vanneihna an mamawh tel a, 1-0 a an hnufual reng hnuah hun tawp hnaih lama Miku leh Udanta Singh goal hmangin hnehna an chang. Bengaluru hian Ningani zanah Aizawl FC chu AFC Cup-ah an hmachhawn ang.
Super Cup inkhel dangah I League club pahnih an intawng a, Mohun Bagan chuan qualifier hmang bawka inpet tling Churchill Brothers chu 2-1 in an hneh. Kolkata club tan I League lama top scorer Aser Pierrick Dipanda bawk a langsar a, Cameroonian striker hian goal hnih a khung.
Tun dinhmunah Aizawl FC, Bengaluru leh Mohun Bagan chu quarterfinal lut chiang tawh an ni a, nizana Minerva Punjab leh Jamshedpur inkhel result kan hre hman lo. Zanin dar 8:00-ah FC Goa leh ATK an inkhel ve leh bawk ang.
Team inthlau
Indian Super League club tam zawkin Super Cup an ngaihlu tawk lo a, squad-a foreigner neih phal zat paruk pawh tlin loin squad an rem hlawm. Hei mai a ni lo, tuna ISL club tana khel player tam zawk hi season thara club thlak mai tur an ni a, thlen san zel ai chuan chawlh hahdam vat thlang an tam zawk ang.
Bengaluru FC erawh AFC Cup an khelh a ngaih tho avangin an tan chuan Super Cup hi inpuahchahna remchang tak a ni a, foreigner pawh neih phal zat paruk an kawl. Gokulam nen an inhmachhawn hmain coach Albert Roca chuan, "Season hmasa khan I League zawh hnuah Federation Cup nomawi kan chawi a, tun season-ah pawh chu chu chhawm nun kan tum," a ti.
Barcelona assistant manager hlui hi a thusawiah a ding nghet a, Gokulam hmaah an ṭhat theih dan berin an inrem. Gurpreet Singh Sandhu-a'n si ban a nghak a, ISL-a tlarhma inkawp rem ber pawl Sunil Chhetri leh Miku an inkawp a, John Johnson leh Udanta Singh te hmel hmuh tur a awm bawk–a tawi zawnga sawi chuan Blues hian ISL-a an starting XI bawk an chhawr.
Beisei loh
Bengaluru striker Miku hlawh ringawt pawh season khatah nuai 300 chuang a ni a, Gokulam season tluan budget nen intluk tawk vela ngaih a ni–hei ringawt pawh hian team pahnih inthlauhzia thui takin a hril a, Bangalore club hi chak tur chianga dah an ni.
Mahse, rin loh lam aṭangin goal kan hmu a, Bhubaneswar khawpuia inkhelah Henry Kisekka chuan minute 33-na lekah Gokulam tan goal hmahruai a khung–Uganda international hi NorthEast United laka goal hnih khungtu kha a ni a, Bengaluru pawhin an dang thei bik lo. February-a Gokulam zawmtu striker hi season tharah ISL club-ah kan hmu a nih pawhin a mak lo ang.
I League club lakah ISL club an tlawm mai dawn nia a lan hnuah Bengaluru-in an zia chhuahin minute 69-naah Miku hmangin an si phurh an sut a, injury time-ah Udanta Singh chuan chakna goal a khung bawk. Bengaluru coach Albert Roca chuan hmasawn an ngai tih pawmin, "Chawlhlawk hman a nih hnuah Gokulam kha an chau zawk a, chance kan la a ni. Match khelh leh turah chuan tun aia ṭha zawka kan khelh a ṭul ang," a ti.
Dicka = goal
Churchill Brothers-in Super Cup khel turin qualifier-ah ISL club Delhi Dynamos chu 2-1 in an hneh a, Goan club-in fak an hlawh. Churchill Brothers-in last 16-ah I League club tho Bagan an hmachhawn zui a, an kal dan ngaihtuahin Goan club an vannei zel dawn niin a lang.
Pathianni zan inkhelah pawh Churchill bawkin goal hmahruai an khung a, Dynamos laka goal hnih khungtu Willis Plaza chuan minute 30-naah goal hmahruai a khung. Kolkata club an talbuai duh lo, first half hun pek belhah penalty hmangin si phurh sutna remchang an nei a, Dicka'n a hlah lo.
Churchill defender Monday Osagie lakchhuah a ngaih hnuah Nigerian center back tel loin Goan club tlarhnung a nghing sawt a, I League top scorer Dicka bawkin goal khung lehin Bagan-in hnehna an chang.