Vawi riat chak zawn Atletico Madrid

Atletico Madrid chuan Barcelona nena an inthlauhna an ti zim ve leh hret. Pathianni zan La Liga inkhelah Atletico Madrid hian Deportivo La Coruna chu si khat faiin an hneh.

Wanda Metropolitano-a inkhelah France forward Kevin Gameiro-a'n minute 34-naah penalty aṭangin goal awmchun a khung a, an khelmual tharah hian a zawnin league match vawi riat chhung hnehna an chang tawh. January 20 aṭang khan an khelmualah hian goal an la chhuah miah lo.

Diego Simeone-a naute hian hmahruaitu Barcelona chu point kuain an phak lo mek a, nomawi an beiseina a la tawp lo - April 4 zanah an hmelma leh elpui Real Mardid an tlawh ang; Real aiin point liin an sang zawk a ni.

Argentine manager hian beisei la nei mahse Lionel Messi awmna Barcelona chu umphak an harsat tawh tur thu a sawi. Catalan club hian Sevilla lakah si hnih an phurh hnuah 2-2 in an inhnehtawkpui thei a, league match bikah tlawm miah loin an la kaltluang zel.

Atletico Madrid manager Simeone chuan, "Messi tel lo chuan Sevilla kha 2-0 in an chak a, a rawn luh hnuah erawh Barca kha 2-0 in an chak let thung, a belhkhawmin 2-2 a ni. Kan tan chuan Barcelona hi umphak theih la ni mah se Messi a awm avangin a awlsam tawh dawn lo," tiin a sawi.

Atletico Madrid hian hrem vangin Antoine Griezmann an chhawr thei lo a, French forward awm loh zanah goal khung kawngah harsatna an tawk - table mawng lama talbuai lai laka hnehna chang tur hian vanneihna an mamawh tel.

Simeone chuan, "Player ṭhenkhat chu ram tana match hnih an khelh hnuah an rawn kir chiah a, hrem vanga inkhel thei lo an awm bawk. Kan tan chuan harsa taka hnehna chan hi a hlu a ni," a ti.