Mumbai City tan Deory khel dawn

3rd April, 2018

Shillong Lajong attacking midfielder Alen Deory chuan Mumbai City tan season tharah a khel dawn. Kum 22 mi Guwahati tlangval hian 2014 aṭang khan Lajong-ah a khel ṭan a, NorthEast United-ah loan-in vawi hnih a chhuak tih loh chu club dang tan a la khel lo.

Sports Authority of India (SAI) leh All India Football Federation (AIFF) Elite Academy aṭanga inzirchhuak Alen hian season hman zawh takah khan Lajong tan match 12 a khel a, goal khat a khung.

Hetihlai hian Chennaiyin FC-in season hman zawh taka ISL nomawi an chawina kawnga player pawimawh Bikramjit Singh chuan Delhi Dynamos a zawm dawn.

Kum 25 mi midfielder hian Pailan Arrows aṭanga a career ṭanin Churchill Brothers, Mohun Bagan, FC Goa leh ATK tan pawh a lo khel tawh a, I League, Federation Cup leh ISL nomawi pahnih ṭheuh a lo chawi tawh bawk.