Man United-in Young Boys an hneh lo
Manchester United tan Cristiano Ronaldo-a'n goal khung chhunzawm hmasa mah se Ole Gunnar Solskjaer-a hote hian Young Boys 2-1 in an hneh lo. Thawhlehni zan Champions League inkhelah Ronaldo telna Man United chu Swiss club Young Boys lakah an mualpho.
Stade de Suisse-a inkhelah Ronaldo hmangin English club-in minute 13-na lekah hma an hruai a, Aaron Wan-Bissaka hnawhchhuah a nih avangin an talbuai zui. Swiss club tan Moumi Ngamaleu-a'n minute 66-naah siphurh a sut a, injury time-ah Theoson Siebatcheu-a'n chakna goal a khung.
Ronaldo telna
Manchester United leh Young Boys inkhel en châk-awmna chu Solskjaer-a'n tu nge a chhawr ang tih a ni a, result lam erawh buaina tur niin a lang lo. Norwegian manager hian Ronaldo chu hmatawngah rawn hmang nawnin Donny Van de Beek, Fred leh Victor Lindelof te chu bul a ṭantir.
Mikhual team-in goal an khung hmaa a, Bruno Fernandes ball fing chu minute 13-naah Ronaldo-a'n a pet goal. Portugal captain hian Newcastle lakah goal hnih a khung tawh a, match hnih lekah goal thum a khung der.
Danglamna Red Card
Man United tan point thum hlawhchhuahna tur niin lang lo mah se minute 35-naah Aaron Wan-Bissaka-a'n a ball lak per laklet a tumnaah Christopher Martins a tlawh a, referee-in red card a pe nghal.
Young Boys khelmual hi astroturf a ni a, Man United-in khelh an harsat tih zep rual a ni lo. United boss Solskjaer pawhin red card hmuh chhanah a ngai. Norwegian manager chuan, "Astro turf vang a ni a, Aaron khan a duh aiin ball a ti per. Referee erawh a thutluknaah hnial a harsa," tiin thil thlen dan a sawi.
Thutlukna dik lo?
Man United leh Young Boys inkar a zau a, chutihrualin Swiss club enkawltu hi Jurgen Klopp-a ṭhian ṭha ber David Wagner a ni. Huddersfield Town leh Schalke manager hlui Wagner hi Klopp ang thoa huai a ni a, attacking football a khel ṭhin.
Solskjaer erawh khualmualah a zam. Inrintawkna nei tura hun mamawh Jadon Sancho chu minute 37-naah la chhuak nghalin Diogo Dalot a dah lut. Norwegian manager hian tlarhnung thuam ṭha nghalah inngai mah se Young Boys-in chance ṭha an nei nghal.
Second half-ah Van de Beek la chhuakin Raphael Varane a rawn lut a, Man United-in an goal neihsa hum an tum. Amaherawhchu Varane awm hnuah pawh an insiamṭha thei lo a, midfield laia awm Fred leh Paul Pogba ten inkhel an thunun thei lo.
Minute 66-naah Silvan Hefti cross chu Moumi Ngamaleu-a'n a tlawh lut a, 1-1 a nih tak avangin Young Boys an phur sawt. Solskjaer-a'n inkhel thlak danglam theih beiseiin Nemanja Matic leh Lingard te a luhtir a, goal nawr leh venhim kawngah a danglam phah lo - Swiss club-in an nawr chhunzawm.
Injury time-ah Lingard a chesual a, second tam pawh a awm tawh lo tihin keeper hnena a back pass chu Theoson Siebatcheu tan ball duhthusam niin Young Boys forward hian chakna goal khung nan a hmang.
Hlim leh hlim lo
Manchester United phur vanglai tak hnehtu Young Boys-in hlimna vawrtawp an chang a, inkhelh ban thlengin anmahni ṭantute nen khelmualah an lawm.
Young Boys coach David Wagner chuan, "Kan theihna zawng zawng kan chhuah a, min ṭantute puihna nen kan beisei phak bak result kan hlawh chhuak. Kan khel ṭha takzet a, player-ten fak an phu," tiin a sawi.
Man United manager Ole Gunnar Solskjaer erawh insawifiah a ṭul a, Norwegian manager chuan, "Matic kha chu inkhel timuang turin a tawnhriat kan mamawh a, Lingard kha chu a tlan theihna kan mamawh thung. Ronaldo leh Fernandes erawhin Newcastle leh Young Boys lakah an tlan tam a, hahchawlh an mamawh," tiin a sawi a, Lingard pawh a tho chhuah leh ngei tur thu a sawi bawk.
Group F inkhel dangah Atalanta leh Villarreal te 2-2 in an inhnehtawk a, team nem bera ngaih Young Boys-in point thum an hmuh tak avangin knockout stage luh a harsa dawn.
Ronaldo-a'n record nihrual
Champions League-a khel tam ber chu Iker Casillas a ni a, Real Madrid legend hian kum 1999-2019 chhung khan match 177 tehmeuh a khel. Cristiano Ronaldo hian Casillas record a nihrual a, a khum thuai dawn.
Player khel tamte
177 Cristiano Ronaldo 2003–
177 Iker Casillas 1999–2019
151 Xavi Hernandez 1998–2015
149 Lionel Messi 2004–
142 Raúl Gonzalez 1995–2011
141 Ryan Giggs 1993–2014