Chelsea tana kawng hawntu Lukaku

Zenit St Petersburg tlar-hnungin rei tak Chelsea chelh mah se Blues-in Romelu Lukaku an neih miau avangin Russian club-in an chelh reng thei lo a, Lukaku goal hmangin Chelsea hi 1-0 in an chak.

Champions League nomawi kawltu Chelsea-in chak result nen bul an ṭan a, an mikhual Zenit laka chak turin vanneihna mamawh tel mah se an khelh ṭhat loh niah pawh an chak avangin an lawm ang.

Group H inkhel dangah Juventus chuan 3-0 in Malmo an sawp bawk a, Alex Sandro, Paulo Dybala (penalty) leh Alvaro Morata ten goal khat ṭheuh khualmualah an khung.

Zenit an ṭang
Russian club-ten European football-ah sulhnu ropui tak nei lo mah se an muala an khelh tawh chuan tum an harsa ṭhin a, Thawhlehni zanah erawh Stamford Bridge-a leng tur an nih avangin fans tam zawkin chak turah Chelsea an dah sa.

Hei hi Zenit coach Sergei Semak pawhin a hai lo a, team ṭha lo zawk an ni tih hre chungin 5-4-1 hmangin a team a rem a, tlarhnungah player a dah khawm - rei tak chhung chu he formation hmang hian Chelsea an chelh thei.

First half-ah ngat phei chuan Blues hian chance hlauhawm tia sawi tur an nei meuh lo a, goal lut loin chawlhlawk an hmang - an ruahmannaah Zenit an hlawhtling.

Dan theih loh Lukaku
Striker ṭha danglamna chu an chance nih chhun goal-a an chantir zel ṭhin hi a ni a, chu striker ṭha zia bawk chu Lukaku-a'n a lantir a, minute 69-naah a chance neihchhun, captain Cesar Azpilicueta-a cross aṭanga ball kal chu a tauh lut.

Lukaku hian an league match hnuhnung bera 3-0 a Aston Villa an hneh pawhin goal hnih a khung a, he inkhelah pawh hian a chance neih pahnih a chhawr. Kum 28 mi striker hian Blues a zawm hnuah match li khelin goal li a khung ta.

Russian club-in goal khungna chance nei lo an ni bik lo a, bench aṭanga luhtir Artem Dzyuba chuan hun tawp lama a chance duhawm chu yard ruk vel leka hla aṭangin a tlawh goal thei lo a, kha chance duhawm kha ui takin an thlirlet vawng vawng ang.

Fak ngai Rudiger
Frank Lampard-a'n Chelsea a enkawl laiin defender Antonio Rudiger a chhawr duh lo a, amah thlaktu Thomas Tuchel-a'n German defender theihna hrechiangin a rinrawlah a hmang thung.

Thawhlehni zanah pawh contract thar ziak tura Chelsea-in an dawr mek defender hi Blues chak nana player thawhhlawk a ni a, tlarhnunga a ngheh piah lamah tlarhma goal nawr kawngah a tlan chakna hmangin a thawhhlawk hle.

Iranian forward Sardar Azmoun-a goal khung ngei tawh tura ngaih a tihbuai hmante chu defender ṭha tih awm reng a ni a, Zenit lama ṭha taka ball a lakluh hnuah a pet goal lohte chu uiawm a tling.

Juve an chak
Cristiano Ronaldo an chân hnuah Juventus-in beisei ang result an nei hleithei lo a, Serie A match thum chu a zawnin an chak zo tawh lo. Champions League-ah erawh thawnthu thlak danglamin a awm a, Malmo laka chak turin harsatna an tawk lo.

Mualneitu Malmo lam hi a tirah hlauhawm ve deuh mah se Alex Sandro chuan Swedish club phur lutuk tur beng daiin minute 23-naah goal hmahruai a rawn khung a, minute 45-naah Dybala chuan penalty hmangin a chhunzawm.

Minute pawh a liam hmain Mo-rata chuan Champions League-a Juve tana a goal 14-na a khung ve leh a, Juve tana Champions League goal khung tam lamah Ronaldo a nih rual chiah - Juve hian an match hnihnaah September 29 khian Chelsea an mikhual dawn a, he inkhel tur hi a nghahhlelhawm tawh hle.

Europe-a inelna sang ber a nih piahlamah Russian champion kan mikhual a, game harsa tak hi chu kan beisei sa a ni. Hna harsa tak kan thawh avangin ka hlim a, kan ṭhat dan bera kan khelh a ngai a nih kha.
Hei hi kan tawpna tur a ni lo a, hmasawn zel turin dinhmun ṭha takah kan awm a ni. Pen khat chu kan pen ta phawt a, mahse, match nga (group stage) kan la hmabak tih hriat a ngai. - Thomas Tuchel, Chelsea coach