Bayern hmaah Barcelona an mualpho

Lionel Messi tel lohna Barcelona chuan Nou Camp-ah Bayern Munich 3-0 in an hneh lo a, Catalan club mualphona chu German club hian hetiang zata chak hi an phu. Thawhlehni zan Champions League inkhelah hian Thomas Muller-a'n goal hmahruai a khung hnuah Robert Lewandowski-a'n goal hnih a khung.

Sum vanga talbuai Barca-in club legend Messi an chelh thei lo a, Antoine Griezmann pawh loan hmangin an chhuah. Bayern lakah inhliam vangin Barca-in Sergio Aguero, Martin Braithwaite, Ousmane Dembele leh Ansu Fati te an chhawr thei lo a, Bavarians laka an chak lo hi a mak hran lo.

Muller leh Lewy
Barcelona-in bul an an ṭan chhe lo a, amaherawhchu Bayern Munich an insiamrem hnuah erawh Catalan club-in an ngam lo. Minute 34-naah box pawn aṭanga Muller-a ball pet chu Eric Garcia a per hnuah goal-ah a lut.

Bavarians forward Muller hian Barca hi a ngam hrim hrim a, Catalan club lama ṭum sarih a khungna a ni. Nou Camp-ah entu mipui sing li an pungkhawm a, auna tur an nei meuh lo.

Second half-ah pawh Bavarians bawkin chance an nei ṭha zawk a, Leroy Sane goal khung tur chu Marc-Andre ter Stegen-a'n a dang ṭha hle. German keeper Ter Stegen pawhin tih theih loh chin a nei a, minute 56-naah Jamal Musiala-a'n goal ban pet perin hemi let hi Lewy-a'n goal-ah a chantir.

Julian Nagelsmann-a'n tlarhnung a rem phui ṭha a, tlarhma lam pawh an hmuhnawm. Bench aṭanga rawn lut player thar Marcel Sabitzer pawhin goal a khung teuh hle.

Minute 85-naah Serge Gnabry-a'n goal ban a pet per a, hemi per let hi Lewy zawnah kher a tla fuh. Polish striker hian cool takin amah vengtu Gerard Pique chu bumin chak nemnghehna goal a khung.

Fak phu Nagelsmann
Kum 34 mi Nagelsmann-a'n Bavarians a her danglam hret hret a, Hansi Flick hunlaia pressure na tak an pek angte pe vek siin team ṭha tak a din mek. Barca lakah pawh hian German manager hian halftime a hmang ṭha a, Bavarians hi second half-ah team dang daih an ni.

Wing back pahnih Alphonso Davies leh Benjamin Pavard ten an 'overlap' nasa a, wing-a awm sa Leroy Sane leh Musiala te an hmunawm em em bawk. Bavarians lawmna tur tak erawh an defender lak thar Dayot Upamecano a che ṭha a, David Alaba hmunruak a hnawh khat ṭha rih hle.

Nagelsmann chuan,"Goal kan chhuah lo hi a lawmawm a, a bik takin na taka kan nawr chunga goal kan chhuah lo hi a lawmawm zual. Inkhelh ṭantirh minute riat vel tih loh kha chu kan khel ṭha takzet a ni," tiin a sawi.

Barca hi...
Barcelona-in Messi an kawl tawh lo a, chutihrualin Argentina captain awm lai pawhin an record hi a duhawm bik chuang lo. Bayern laka an tlawm hma hian Nou Camp-ah PSG chu 4-1 ngawtin an hneh lo a, group stage hnuhnung berah Juventus 3-0 a an hneh loh bawk avangin an mualah a zawnin ṭum thum si thum faiin an chak lo tihna a ni.

Hei chauh hi a la ni lo, August 2000 khan Bayern Munich lakah hian 8-2 zetin an mualpho tawh bawk. Chutihrualin group E-ah hian Benfica leh Dynamo Kiev te an awm a, Barca tan knockout stage thlenna kawng a la inhawng zau hle.

Barca captain Pique chuan, "Goal ni loin inkhel kan thlir chuan first half-ah chuan kan intum tawk. Hun tawp lamah chuan player naupang tak tak an rawnlut a, chutichung chuan kan ṭang thei hle. Kan rawn tho chhuak ngei ang," tiin a sawi.

Catalan club hian bul ṭantu zingah kum 18 mi Pedri, Eric Garcia (20) leh Ronald Araujo (22) te an chhawr a, bench aṭangin kum 17 mi pahnih Gavi leh Alejandro Balde bakah Yusuf Demir (18) leh Oscar Mingueza (22) te an luhtir a, hmabak erawh an nei êng hle.