Player 127 zuan khumtu Raducanu

Tennis ranking a chhuak thar a, hmeichhe lamah Emma Raducanu chu court chhunga langsar ber a nih ang bawkin ranking-ah pawh a langsar. British tleirawl duhawm hian a hmaa player awm 127 zet a kal khum a, tunah chuan world number 23 a ni ta.

Mipa lamah Rafael Nadal chu a sang zual panga zingah a tel phak ta lo, parukna dinhmun a luah. Grand Slam vawi 20 champion tawh Roger Federer chu inkhel mumal thei lo rei viau tawh mah se pakuanaah a la awm hram hram.

A sang zel
US Open khelh zawh takah khan world number 150 ni chungin Raducanu hi a inlan, a ranking a hniam em avang hian main draw khel tur chuan a tling phak nghal lo - harsa takin qualifier a khelh a ngai; inelna tak hmachhawn turin player pathum a paltlang a ngai tihna a ni.

Kum 18 mi hian beisei phak baka ṭhain tournament a khel, nomawi a chawina kawngah hian qualifier chhiar telin match 10 a khelhah set hloh miah loin a tawp thleng, qualifier paltlanga Grand Slam khel champion thei hmasa ber a ni hial.

Mi tam tak chuan Raducanu hian khawvel a barakhaihah an ngai, a coach hlui Mark Petchey erawhin mak a ti hran lo. A naupan laia lo kaihhruai tawhtu coach chuan, "National Tennis Centre-ah a vawi khat nan kan inhmu a, a ni hmasa ber aṭangin a danglam tih ka hre nghal.

"Andy Murray kha kum 16 mi a nih lai aṭangin ka lo enkawl tawh a, theihna sang tak a nei tih ka hre sa bawk. Tuna Raducanu rawn che ṭha pawh hian min barakhaih hran lo, hmasawnna tur tam tak chu a la nei ngei a, tluang taka a khel zel thei a nih chuan a ṭha ber zinga mi ni turin theihna a nei," a ti.

Player dang
US Open final-a chak lo zawk Leylah Fernandez pawh 45-na aṭangin 28-naah a kaisang a, hmeichhe player zingah kal fal thei an tam loh avangin ranking hi a inthlak danglam chak deuh ni pawhin a lang; player pahnih hian season zawh hmain inelna dangah an ranking an la tihsan belh thei ang.

Wimbledon champion Ashleigh Barty chuan point 10075 hmuin a chung ber dinhmun a luah chhunzawm. Australian star hian season hnih chhung chu a chung berah hmun a chang tawh a, pahnihna Aryna Sabalenka-i'n point 7720 chauh a la neih avangin Barty hi pakhatna a nih tlang leh a rinawm.

Rilru lam harsat vanga buaina nei, mahse dam leh tawh Naomi Osaka-i'n inelna a hmachhawn dawn rih lo tih a sawi a, number 5-ah a tlak hniam avangin season thara Australian Open an khelh hunah seeded sang a ni phak dawn lo - nomawi humhim tumna kawng a harsa sawt ang.

Chawlhkar 319 chhung zet world number 1 lo ni tawh Serena Williams chu a sang zual 20 zingah a tel phak lo. American star hi a vanglai a pel tawh a, tun hnaiah result a neih ṭhat tawk loh avangin 22-na a ni. Tleirawl beiseiawm Cori Gauff erawh 19-na a ni phak thung a ni.

Parukna Rafael Nadal
World number 1 hlui Rafael Nadal-a'n French Open aṭanga a tlak hnuah match a la khel leh lo, Spanish tlangval hian hliam a nei a, tun season chhungin a inkhel leh thei ang em, tih a la chiang lo - a ranking a tlahniam pawh hi a mak hran lo.

Wimbledon leh US Open khel lo Nadal tan ranking siam ṭhatna hun a la awm lo a, a elpui hautak ber ni ṭhin Federer pawh season thara a lo kir leh meuh chuan a ranking a hniam zual tawh khawp ang; player pahnih hian seeded sang ni chungin Australian Open 2021 an khel thei dawn lo a ni.

US Open final-ah chak lo mah se Novak Djokovic erawh a chung berah a awm chhunzawm a, world number 1 ni chunga season a khar leh a nih chuan Pete Sampras khumin a chungnung tawh ang - record thar a siam ngei dawn.

Season tawpa a thiam pariatten an khelh ṭhin ATP Finals atan Daniil Medvedev leh Stefanos Tsitsipas te an tling chiang tawh, anni pahnih hma hian Djokovic a lo tling tawh, hmun ruak hnawh khah tur panga a la awm tihna a ni.

Tuna a lan dan chuan Alexander Zverev, Andrey Rublev, Nadal leh Matteo Berrettini te chu ATP Finals khel thei tur zinga awm mek an ni a, an dinhmun erawh a la chiang lo. Season hmasa US Open champion Dominic Thiem erawh tun season chhungin a inkhel thei tawh dawn lo.