Hlawhtling takin Elliott an zai

Liverpool midfielder Harvey Elliott chu Leeds United nen an inkhelh ṭuma a hliam chu zai a ni a, a lo kir hun tur chiang taka sawi theih ni lo mah se Liverpool chuan tun season-ah a lo kir theih an beisei thu an sawi.

Liverpool chuan an player hi a kerek vei lam ruh a pelh thu an sawi a, club doctor Jim Moxon chuan, "Hlawhtling takin zai a ni a, khelmuala a kir leh thuai theih nan tun aṭang hian hma a la ṭan nghal ang," a ti.

Jim Moxon chuan sawi zawmin, "A lo kir theih hun tur ni leh thla sawi a, a chunga pressure dah kan duh lo a, ṭha taka enkawlna pe chungin season tawp lamah erawh a rawn kir theih kan beisei ang," a ti.

Kum 18 mi Elliot hian kum 2019 khan kum 16 mi lek ni chungin Fulham aṭangin Liverpool hi a zawm a, season hmasa kha Championship club Blackburn Rovers lamah loan-a hun hmantir a ni.

Tun season-ah Anfield-ah a kir a, Klopp-a'n fans tam tak barakhaihin English rawlthar hi a ring a, league match li an khelh tawhah bul a ṭantir vek. Mahse, hliamin a tlakbuak zui a, a vanduai takzet.

Leeds defender Pascal Struijk-a'n Elliot a tlawh hliam tirh khan Liverpool player tam tak chu an mangang tih a hriat a, a bul hnaia awm Mohamed Salah phei chuan hlauthawng tak chungin medical team lam a ko.

Reds goalkeeper Alisson chuan, "Harvey chunga thil thleng avang khan hrehawm ka ti takzet a, khelmuala awm ve phei chuan awm dan tur hriatthiam a har duh hle. Player zawng zawngten kan thlawpna a mamawh a, theihtawp kan chhuah a ngai a ni," a ti.

Elliot tlawh hliamtu Struijk hi Liverpool nena an inkhelah khan red card pek a ni a, Leeds lam chuan red card pekna tur nia an ngaih loh avangin an khinglet mek.

Liverpool rawlthar Elliott chuan, "Struijk-a thiam loh a ni lo a, red card pawh a ni lo. Tihpalh thila thleng ve mai a ni a, mahse, hetiang hi chu football-ah a thleng ve ṭhin. Tun hma aia ṭha zawkin ka lo kir leh ang tih hi 100% in ka sawi ngam a, in mi thlawpnaah lawmthu ka sawi e," a ti a, kum 22 mi Struijk a chhan.