Foxes mualah Napoli

Zanin aṭangin Europa League group stage an khel ṭan dawn. Leicester City chuan an match hmasa ber atan dar 12:30 hian King Power Stadium-ah Napoli an lo mikhual dawn a, round hmasa berah chuan inkhel ngaihven hlawh ber a ni ang.

Premier League club zingah West Ham an inlan dawn bawk. Hammers hian Dinamo Zagreb an lenchilh dawn, manager David Moyes-a'n tun hnai result an neih ṭhat tawk loh chu insiamṭhat nan hman an tum thu a sawi tawh a, hna erawh a hautak dawn.

Foxes an buai?
Leicester City hi Manchester City hneh lo hlim an ni, tun hnaiah an player hliam an tam avangin an ṭhat dan berin an khel thei rih lo. Brendan Rodgers-a'n a chhawr rim zingah chuan Ricardo Pereira chauh hi tlarhnung lam player zinga 100% fit tia sawi ngam a ni hial.

Timothy Castagne leh Jannik Vestergaard te inkhlel thei tho mah se duhthusam an ni rih lo. An hmachhawn tur Napoli hian ball thiam leh hriam tak Lorenzo Insigne an kawl avangin English club tan tlarhnung lam inven uluk a ngai dawn.

Nipui bazar laia thawm nei hat, mahse chhuak ta lo James Maddison-a'n beisei a phak rih lo. English playmaker hian match 15 chhung chu goal leh assist a nei ta lo, tlarhma lama tlan Kelechi Iheanacho a hriam tawk loh bawk avangin Jamie Vardy chungah mawhphurna a sang zual leh ngei ang.

Juve hnehtu
Napoli hian Serei A match hnuhnungah Juventus 2-1 in an hneh. Old Lady an hneh theih nan hian winger Matteo Politano leh centre-back Kalidou Koulibaly ten goal an khung a, zaninah pawh anni pahnih hi tlarhma leh a hnung lama mi pawimawh an ni dawn.

Hliam vangin Belgian forward Dries Mertens dinhmun a chiang lo a, hei vang hian Insigne leh Politano te an pawimawhna a zual leh dawn - anni pahnih hi Foxes tlarhnung tana ven ngun ngai tur bik an ni dawn a, ven hneh an awmsam lo mai thei.

Coach Luciano Spalletti-a'n a keeper duhlai David Ospina hnen aṭangin English football chungchang tam tak a hre dawn, a ṭangkai thei ang. Tun season league match vawi thum khelh tawha la chak vek an nih avangin an boruak a ṭha - Leicester mualah chak an tum ngam ang.

Inlan Tura Beisei
Leicester City (4-2-3-1): Kasper Schmeichel, Ricardo Pereira, Caglar Soyuncu, Jannik Vestergaard, Ryan Bertrand, Boubakary Soumare, Wilfred Ndidi, Ademola Lookman, Kelechi Iheanacho, Harvey Barnes, Patson Daka.

Napoli (4-3-3): David Ospina, Giovanni Di Lorenzo, Amir Rrahmani, Kalidou Koulibaly, Kevin Malcuit, Fabian Ruiz, Andre-Frank Zambo Anguissa, Piotr Zielinski, Hirving Lozano, Victor Osimhen, Lorenzo Insigne.