FIA-in chhui chiang dawn

Motosports thuneitu sang Federation Internationale de l'Auto-mobile chuan Max Verstappen leh Lewis Hamilton te chetsualna an chhui chiang dawn a, hrem ngai an awm a nih chuan an hrem ang.

Italian Grand Prix tlan zawh takah khan Verstappen-a'n a hma a tlan Hamilton tlan pelh a tumna lamah an chesual. Red Bull driver hi Mercedes car chungah a tlan lawn a, driver pahnih hian inelna an hmachhawn zui thei lo.

FIA race director Michael Masi chuan, "Chetsualna hrang hrang a lo thleng tawh ṭhin, a thlen dan a inang vek ngai lo. Tun ṭuma mi pawh hi tun hma lama kan la hmuh ngai loh ang a ni a, chuvangin zir chian hmasak a ngai dawn.

"Driver zingah midang tih nat leh thil ti sual lui duh an awm ngai lo, infiamna thianghlim leh nuam tak a ni a, chutih rualin intih palh theih a ni tih erawh kan hriat nawn a ngai," tiin a sawi a, thil thlengah driver pahnih hi mawhphurtuah an inpuh tawh a ni.