Group G-ah chak an awm lo

Champions League group G inkhelah chak an awm lo a, Thawhlehni zan khan he group-a awm team-te chu an inhnehtawk vek - red card pahnih phawrh a ni thung.

Sevilla leh Red Bull Salzburg te chu 1-1 in an inhnehtawk a, Lille leh Bundesliga club VfL Wolfsburg te chu goal khung loin an inhnehtawk bawk a, rin lawk ang ngeiin group G lam an intiat tawk hle.

Spanish club Sevilla khelmuala inkhelah Salzburg-in penalty vawi thum ngawt an hlawh chhuak a, vawi khat chiah an pet goal thung!

Salzburg tan rawlthar duhawm Karim Adeyemi a hmuhnawm takzet a, tun season match 11 aṭanga goal sarih khung tawh striker hian minute 40 a tlin hmain Austrian club tan penalty vawi thum a hlawh chhuak hman.

Austrian club tan an penalty hmasa ber hi kum 19 mi Adeyemi hian a pet a, mahse, a pet goal lo. Adeyemi-a'n minute 21-naah a vawi hnih nan penalty a hlawh chhuak leh a, Sucic chuan goal-ah a chantir.

Salzburg an vannei nawn - Adeyemi bawkin penalty a hlawh chhuak leh a, mahse, Sucic-a'n post a pet per a, Sevilla an vannei takzet.

Chawlhlawk hman a nih hmain Sevilla hian Youssef En-Nesyri hmangin penalty an hlawh chhuak ve leh a, Ivan Rakitic chuan harsatna nei loin goal-ah a chantir.

En-Nesryi hi minute 50-naah a yellow card pahnihna avangin hnawhchhuah zui ni mah se vawi hnih ngawt penalty hlahtu Salzburg-in a tam zawk nih an chhawr thei lo a, 1-1 a inhnehtawk hi Sevilla tan chuan result ṭha a ni.

Group G inkhel dangah Wolfsburg-in minute 63-naah red card vangin John Brooks chân mah se French champion Lille lakah an tlawm phah duh lo a, 0-0 a inhnehtawkin team pahnih an ṭin.