Europa Conference League: Spurs inlan hun a thleng ta

Champions League leh Europa League khel phak lote tan inelna thar a awm a, a hmingah Europa Conference League an ti.

Premier League 'big six' aṭangin club pakhat chu ECL season hmasa berah an inlan dawn a, an hming chu Tottenham Hotspur an ni.

Zanin dar 10:15-ah Spurs hian French club Rennes khelmual an lenglut dawn a, London club ṭantute ten chak result nen France an chhuahsan an beisei ang.

Jose Mourinho enkawl AS Roma pawh zanin dar 12:30-ah an inlan ve dawn bawk a, tun season-a tlawm la nei lo team hian CSKA Sofia an mikhual ang.

Spurs tan chona
Kum 2008-a League Cup an champion hnuah Spurs-in champion nomawi an chawi leh tawh lo a, London club tan chuan ECL inelna hi nomawi chawina remchang tak a ni thei.

Spurs coach Nuno Espirito Santo hian Championship-ah kum 2018 khan Wolverhampton Wanderers a champion pui a, top flight football-ah nomawi chawi a la nei lo.

London club leh coach Nuno ten nomawi chawi an châk ang tih a chiang a, chutihrual chuan duhawm taka season bul an ṭan chu kartawp khan tihtawpsak an ni.

Spurs hi an league match hmasa pathuma hnehna an chan hnuin Crystal Palace lakah 3-0 ngawtin an mualpho a, hnehna chan an tum a nih chuan Rennes lakah insiamṭhat a ṭul ang.

Hliam an tam
Tun dinhmunah Spurs damdawi in a lun rih hle - international break-a ram tana feh chhuak Davinson Sanchez, Cristian Romero leh Giovani Lo Celso te chu inkhunghran avangin an la inlan thei dawn lo.

Player inhliam Son Heung-min, Ryan Sessegnon leh Steven Bergwijn te an inlan theih a la rinawm chiah lo a, Palace laka lakchhuah ngai Eric Dier dinhmun a la hriat loh bawk.

Rennes laka chak tur tawk team erawh Spurs hian an la nei tho. Si ban nghak turin Hugo Lloris hahchawlhtir pawh ni se Pierluigi Gollini an nei a, fullback-ah Emerson Royal leh Sergio Reguilon aiah Matt Doherty leh Ben Davies an luh a rinawm.

Jack Clarke leh Bryan Gil tan Nuno mit tlunna hun ṭha a ni ang a, Harry Kane a hahchawl a nih chuan Dane Scarlett emaw tawnhriat nei ṭha Lucas Moura tan hun ṭha a awm ang.

Rennes hi?
Season hmasa Ligue 1-ah parukna an nih avangin Rennes-in ECL playoff an khel a, Norwegian club Rosenborg chu 5-1 ngawta sawpin group stage an inpetkai.

Mahse, Ligue 1 lamah Rennes hian beisei an phak lo zui a, ECL an inpetkai hnua match hnih an khelhah Angers (2-0) leh Reims (2-0) an ngam lo a, ECL inpetkai hma nen league match nga an khelhah vawi khat chiah an la chak - vawi hnih draw result an nei.

Ligue 1 table-a 11-na ni mek Rennes hi an ṭhat dan berin an khel thei dawn bik lo. Reims laka inhliam striker Martin Terrier dinhmun a la chiang lo a, Liverpool nena sawizawm Jeremy Doku chu inhliam vang thoin a inlan loh a rinawm zawk.

Left back Birger Meling leh attacking midfielder Lovro Majer te hliam vangin an la chawl mek a, goalkeeper Alfred Gomis chu Covid-19 vangin khunghran mek a la ni rih bawk.

Roma an ṭha
ECL group stage aṭangin champion rin hlawh ber thlang dawn ila, tam tak chuan Spurs ai pawhin Mourinho enkawl AS Roma an thlang ang - Portuguese coach hnuaia match nga an khelh tawhah an la tlawm lo.

Roma hian zanin dar 12:30-ah Bulgarian club ṭha CSKA Sofia an mikhual dawn a, hnehna chang ngei tura beisei an ni. Roma tan defender Chris Smalling a lo kir leh tawh a, Italian club hian player inhliam awm lo deuhthawin CSKA an hmachhawn thei ang.

Mourinho-a'n an ṭhat dan berin team a rem a rinawm chiah lo a, a formation ngainat 4-2-3-1 a hmang leh dawn a nih chuan Tammy Abraham chu hahchawlhna pein Uzbekistan striker Eldor Shomurodov-a'n bul a ṭan a rinawm.

CSKA Sofia tan league match li an khelha goal li khung tawh Jordy Caicedo chu hrem vangin a inlan thei dawn lo a, right back Thibaut Vion, Dutch centre back Menno Koch leh striker Bismark Charles te chu hliam vangin an inlan thei dawn lo bawk.