Santosh Trophy-ah Mizoram tel dawn

All India Football Federation chuan August thla tawp khan Football House, Delhi-ah executive meeting a nei a, Santosh Trophy nei turin thutlukna a siam.

Covid-19 vangin nikum khan Santosh Trophy chu ṭhulh a ni tawh a, kuminah erawh neih a ni dawn. Nimin khan MFA executive committee chuan Santosh Trophy a tel turin thutukna an siam.

NorthEast Zone Qualifier hi November 21 leh December 5 hian Shillong leh Imphal-ah khelh a ni dawn a, fixture tihchhuah a la nih loh avangin Mizoram awmna group tur zawk hi a la hriat loh.

Mizoram team hi MFA technical officer Samson Ramengmawia bakah executive committee member K. Lalenghluna leh R. Lalramzauva ten an buaipui ang.

November 10-30 inkar hian Senior Women's Championships neih a ni dawn a, Mizoram pawhin tel ngei an tum. Hmeichhe team hi Women's Committee chairman Lalruatsanga Tochhawng bakah coach pahnih Suzanne Ralte leh Lalsangzuala Hmar ten an buaipui ang.

Nimin MFA executive committee chuan 2021 - 22 season chhunga MFA hnuaia committee pêng hrang hrang hruaitute an ruat a; MFA hnuaia inelna hrang hrang kalpui dan tur chu hripui leng chungchanga sorkar dan ngaichang chungin ruahmanna siam a ni ang.

MFA Annual General Body Meeting pawh May thlàa neih tura ruahman chu sawn hlat a nih hnuah sorkar SOP-in a phal chuan kumin chhunga neih tum a ni.