Club Brugge-in Messi leh PSG an chelh

Lionel Messi-a'n Nilaini zan Champions League inkhelah Paris Saint-Germain kawr hain bul a ṭan a, Club Brugge hmaah Argentina captain hi a che thei lo. Jan Breydel Stadium-ah Club Brugge leh PSG te 1-1 in an inhnehtawk.

French club-in tlarhmaa Messi, Neymar leh Kylian Mbappe te bul an ṭantir zanah Ander Herrera-a'n PSG tan goal hmahruai a khung a, mualneitu Club Brugge-in Hans Vanaken hmangin an sut.

Group A-ah hian PSG, Manchester City, RB Leipzig leh Club Brugge an awm a, inkhel dangah English champion Man City-in German club Leipzig hi 6-3 in an sawp.

PSG an kim?
Mauricio Pochentino leh a hoten kartawp Ligue 1 inkhelah Clermont Foot 4-0 in an sawp a, an kim lo. South America rama World Cup qualifier khela zin Messi, Neymar, Angel di Maria leh Leandro Paredes ten awm lo.

Brugge lakah hian Di Maria awm lo mah se Poch-a'n Messi, Neymar leh Mbappe te a chhawr theih avangin an kim thawkhatah a ngaih theih.

A vawi khat nan MNM - Messi, Neymar leh Mbappe te chu inkawptir a ni. Tlarhnungah Sergio Ramos a la awm lo a, Gianluigi Donnarumma aiah Keylor Navas thlan a ni bawk.

Goal khat ve ve
Inkhel an ṭan chauh a, minute 15-naah player ṭha danglamna a lang. Mual vei lamah Kylian Mbappe chuan a theihna a pholang a, Brugge right back Clinton Mata chu bumin a ball cross chu Herrera-a'n goal-ah a chantir.

Kartawp inkhelah Messi leh Neymar awm loh laiin Herrera-a'n goal hnih a khung tawh a, a awm hnuah pawh goal a la khung tho. PSG-in awlsam takin hnehna an chang turah ngaih theih mah se rin ang ngawt a ni lo, mualneitu an khel ṭha ta zawk.

Belgian club-in PSG tlarhnung an ṭhait a, Eduard Sobol cross ball chu captain Hans Vanaken-a'n goal-ah a chantir a, mintue 27-naah 1-1 a ni. Inkhel a nung sawt.

Khaw nge Messi?
Messi hi goal a khung loh avangin reh tawp chu a ni lo. Argentine forward ball pass chu Mbappe-a'n goal-ah a pet a, keeper Simon Mignolet-a'n a dansak. French forward hian Neymar pe zawk se chuan a goal hial ang, MNM an la inkawp rem lo.

Kum 34 mi Messi hian Neymar hnen aṭanga a ball hmuh chu Barcelona-a a tih ṭhin danin goal-ah mawi takin a pet kual a, crossbar a per - goal ngat se chuan ha hipa sawi theih tur a ni.

Second half-ah pawh Neymar leh Messi ten Brugge tlarhnung an ṭhiat a, Argentine forward hian goal-ah pet mah se Loverpool keeper hluiin a dansak. Messi-a'n goal a khung lo a, Neymar leh Mbappe nen an inkawp chungin Brugge tlarhnung an ti buai tawk lo.

PSG buaina belhchhah turin Mbappe chu minute 51-naah kerek hliam vangin thlak a ni a, French forward hi a hliam na a nih chuan MNM hmuh tur a awm leh lawk dawn lo tihna a ni thei ang.

Brugge an ṭha zawk
Player hming aṭanga thlir chuan PSG an ṭha zawk a, khelmuala an chet danah erawh Brugge an ṭha zawk. French club hi khualmuala point an hlawhchhuah avanga lawm zawk tur a ni.

Brugge tan hian kum 20 mi Charles De Ketelaere chu a hmuhnawm a, kum 2020 khan Belgian Promising Talent of the Year a thlan a nih tawh avangin Belgium-ah chuan a lar thawkhat tawh ang. PSG star rual aiin De Ketelaere hi a hmuhnawm zawk.

Belgian club tan hian captain Vanaken bakah Noa Lang te an che ṭha a, Ajax academy chhuak Lang hian bicycle kick hmangin chakna goal a khung teuh takzet.

Kan tan zan ṭha a ni lo. Hlauthawng loin rim takin kan thawk tur a ni a, hun kan la mamawh. Hma kan sawn ang a, hun ṭha a rawn la inher chhuak ang. Tumah an khelh danah an lawm lo. Club Brugge an khelh ṭhat avangin fak an phu, keini aiin chak an châk zawk a ni. Messi, Neymar leh Mbappé te inkawp rem turin hun a la ngai a, team din tur pawhin hun a la ngai a ni. - Mauricio Pochettino, PSG manager