Goal khung thei Man City

Striker nei lo Manchester City-in goal khung an harsat lo a, Nilaini zan Champions League inkhelah RB Leipzig lakah goal ruk ngawt an khung.

Etihad Stadium-a inkhelah Man City tan Nathan Ake, Riyad Mahrez, Jack Grealish, Joao Cancelo leh Gabriel Jesus ten an khung bakah Nordi Mukiele-a'n an lamah a ti lut. German club tan Christopher Nkunku-a'n hattrick a siam a, inkhel a nung hle.

RB Leipzig defender Angelino chu minute 79-naah hnawhchhuah a ni a, German club hi kim loa an khelh tluan avangin Man City-in hun tawp lamah harsatna an tawk lo.

Goal kua ngawt luh zanah pound maktaduai 100 man Grealish a goal khung a mawi a, English midfielder hian mual vei lam aṭanga la lutin a ke dinglamin mawi zetin a hlai lut.

Pep Guardiola-a'n Sergio Aguero thlakna tur player la lo mah se goal khung kawngah harsatna an tawk lo a, Premier League nomawi humhim tur leh an la chawi loh Champion League nomawi chawi turin an ṭha tawk tih a pholang.

Man City manager Guardiola chuan, "Etihad Stadium-a match hnuhnung pathumah goal 16 zet kan khung. Hemi a nih avang hian ka naute an chau dawn a, kartawpa Southampton kan mikhual tur pawh a harsa khawp ang," tiin a sawi.