Milan lakah Liverpool an comeback leh ta!

Football ngainatute chuan Champions League 2005 final kha an theihnghilh tawh lo ang - AC Milan laka 3-0 a an hniam hnuin Liverpool-in comeback ropui an lantir a, champion nomawi an chawi a nih kha.

Nilaini zanah thawnthu ngai chu herlumin a awm a, Milan lakah 2-1 a an hnufual hnuin Liverpool an 'comeback' a, Anfield-ah 3-2 in hnehna an chang.

'Miracle of Istanbul' tia hminglem an vuah final nen danglamna erawh tam tak a awm tawh - 2005-a star hlang awmna AC Milan chu rin hlawh lo zawk an ni a, Liverpool an 'comeback' hi thilmak a tling lo mai a ni lo a, chak tura rin hlawh zawk an chak.

Milan hian minute kuana leka Fikayo Tomori-a own goal chu Ante Rebic leh Brahim Diaz hmangin chhanglet mah se Reds-in Mohamed Salah leh Jordan Henderson hmangin an khung ve leh a, a tawpah 3-2 in an chak.

Liverpool chanpual
Champions League-a match hmasa bera chak pawimawhzia hrechiangtu chu Jurgen Klopp a ni a, mahse, Liverpool manager hian mak tak maiin Milan lakah Virgil van Dijk leh Sadio Mane chu bench-ah a dah!

VVD aiah season hmasa lama Dutch defender ang thoa inhliam Joe Gomez chu bul ṭantir a ni a, tlarhmaah tun season-a la inlan lo Divock Origi chuan Diogo Jota leh Salah a rawn dinpui daih bawk.

Midfield-ah Fabinho, Naby Keita leh Hendo te inkawptir an nih avangin midfield hi an 'creative' tawk lo tiin a sawisel theih a, mahse, a team hrechiangtu Klopp-a duhthlanna a ni miau si.

Rin loh ang taka an rawn inremkhawm chungin Liverpool an hmuhnawm a, goal nawr hna an thawk a, Milan lamin a inven lam bak an ngaihtuah hman lo a ni ber - minute kuana lekah Reds-in goal an khung ta nge nge a, Salah siamsak ṭha tak chu Trent Alexander-Arnold-a'n um lutin a shot chu Chelsea defender hlui Tomori-a'n an lamah a dang lut.

Rin loh lam
Liverpool-in goal an khung hnuah pawh an duhtawk lo. Milan an nawr chhunzawm a, goal an khung aṭanga minute ngana lekah penalty an hlawh chhuak zui - Andy Robertson-a 'shot' Ismael Bennacer-a'n a kuta a lo dan vang a ni.

Penalty pet turin Salah a lo ding chhuak a, Egyptian forward puala an hla phuah sa chungin fans-in an player hi an lo pui bawk - mahse, Salah-a'n a pet goal lo a, vawi 19 penalty a peta a vawi hnih a hlahna chiah a ni.

Kum 29 mi Salah-a'n a pet ṭha tawk lo a, keeper Mike Maignan tan dan harsa a ni lo. Salah-a'n penalty hlah mah se Reds-in an nawr na a, fans an hlauthawng lo.

Mahse, thilmak a thleng - minute 40 a liam a, first half tawp hma minute thum chhungin Milan-in Rebic leh Diaz hmangin goal an rawn khung a, Anfield-ah 2-1 in hma an hruai daih!

Zero to hero
Liverpool-in an nawr luatah tlar-hnung an ngaihthah zauh a, Champions League 'level' a nih chuan eng team pawh tum se inthlahdah a thiang lo tih hrilh nawnin an awm.

Second half khelh a ni a, team ṭha zawk danglamna a lang zui. Origi ball siamsak mawi zet chu Salah-a'n a penalty pet goal loh thup mawi nan a pet lut a, second half ṭan aṭanga minute thumnaah si phurh a sut fel der.

Salah hian tun season inelna hrang hrangah match li khelin goal li a khung der tawh a, assist vawi hnih a nei bawk. Liverpool tan inelna hrang hrangah match 208 khelin goal 129 a khung a, assist vawi 49 a nei tawh.

Champions league bikah Liverpool tan match 44 khelin goal 26 a khung a, assist vawi 10 a nei bawk. European football-a club inelna sang bera Liverpool tana goal khung hnem ber Steven Gerrard (30 goals) tluk turin goal li chiah a mamawh ta.

Captain Hendo
Liverpool-in hma takah si phurh an sut a, an beisei angin goal thumna erawh an hmu lawk lo. Minute 69-naah beisei loh lam aṭangin Jordan Henderson a rawn lang a, a 'shot' chu Milan keeper Maignan tan dan ngaihna a awm lo.

Milan-in hliam vangin an thiampuipa Zlatan Ibrahimovic an chhawr thei lo a, hetihlai hian Liverpool erawhin bench aṭanga Mane, Thiago Alcántara, Alex Oxlade-Chamberlain, Curtis Jones leh James Milner te ho an luhtir theih avangin team pahnih an inthlau.

Liverpool-in Anfield-ah Champions League match-a inthlahdah zeuh pawizia zir tel chungin point thum an hlawh chhuak a, an group-ah Atletico Madrid leh FC Porto te an la awm tel bawk si avangin an chak hi an lawm khawp ang.

Milan-in Anfield-ah vanneih vangin goal hnih an khung a, 'group of death' tia hminglem an pek group aṭanga talchhuak thei tur chuan insiamṭhat an mamawh tih a lang.

Ka beisei chu 100% a ni a, chu chu kan tlin teuh hle. Game hmuhnawm tak a ni a, mahse, minute 10-15 vel chu kan kal zel dan turah khan kan bo a ni. Keimahni kan inham buai a, buaina kan insiam chawp a ni. Kan tawlh hnung lutuk a, midfield-in a kar awl hnawh khah tur an hnawh khat lo a, chuvang chuan ball inpein goal an rawn khung theih phah a ni. Mahse, chawlh lawkah kan insiamṭha a, game ṭha tak khelin goal mawi pahnih kan khung a ni. Tunah chuan mipuiin Milan theihna an hrechiang tawh a, 'pot four' a an awm kha mak an ti tawh ang. He group aṭanga thleng sang tur chuan match tina point hmuh zel a ṭul ang. - Jurgen Klopp, Liverpool manager