Saurez leh Griezmann telna Atletico chak zo lo

Atletico Madrid-in Champions League-a an match hmasa ber chu Porto mikhual chungin Nilaini zan khan an khel a, Wanda Metropolitano khelmualah goal an khung loh avangin an khingpui nen hian 0-0 in an inhnehtawk.

Spanish club tan striker chhuanvawr Luis Suarez chuan minute rukna lekah chance duhawm a nei a, mahse, Porto keeper Diogo Costa-a'n a dansak - Atletico-in first half-ah chance chhuan tham sawi tur an nei tawh lo.

Atletico tan minute 56-naah Antoine Griezmann luhtir a ni a, Barcelona tana season hnih a khelh hnua Wanda-a kir player hian lawm a hlawh lo hle - inkhelh hmain fan-ten an au el, a luh dawn pawhin au el tawk an awm. Sum tam zawk uma Barca a pansan kha ngaidam thei lo an la tam zawk tih a chiang.

Griezmann luh hnuah pawh Atletico game a danglam phah lo a, khelmuala a awm chhunga a tih ṭhat ber chu hun pek belh minute nganaa amah vanga Porto defender Chancel Mbemba hnawhchhuah a ni chu a ni - mahse, Atletico tan tam zawk nih chhawrna hun a awm lo.

Inkhel pumpui thlirin Porto-in ball chang tlem mah se an vanduai zawk tiin a sawi theih - attacking midfielder Otavio chuan post a tih per a, Iranian forward Mehdi Taremi leh Liverpool midfielder hlui Marko Grujic ten an chance duhawm tak an hlah bawk.

Porto hi minute 80-naa an goal khung chu VAR hmanga ennawn a nih hnuah Taremi-a handball hman avangin pawmsak an ni lo bawk a, Atletico goalkeeper Jan Oblak chuan, "VAR-in a lo hmu kha kan vannei takzet a ni," tiin a sawi.

Portuguese club Porto hi Champions League group stage match ruk chu a zawnin an tlawm lo tawh a, hetih chhung hian goal an chhuah miah lo bawk - Atletico hi Champions League match an muala an khelh hnuhnung 12-ah a zawnin an tlawm ta lo bawk a, mahse, an chak miau loh avangin an record-ah an lawm lo ang.