Premier League Zaninah Leeds Vs Newcastle

Zanin dar 12:30 hian Elland Road-ah Leeds United leh Newcastle United te an inkhel dawn a, club langsar pahnih hian tun season Premeir League match li khelh tawhah chak an la nei lo.

Leeds hi Liverpool laka tlawm hlim an ni a, Newcastle hian an match hnuhnung berah Manchester United an hneh lo thung. Team pahnih tan zanin hi insiamṭhat theihna hun ṭha a ni a, an intum tawk khawp ang.

Result ṭha lo
Leeds hian an match hmasa berah Manchester United 5-1 in an hneh lo a, Everton (2-2) leh Burnley (1-1) nen an inhnehtawk hnuah Liverpool lakah 3-0 in an tlawm. Marcelo Bielsa-a'n tlarhnung an la rem phui thei lo a, league match li khelh tawhah goal a la chhuah vek.

Newcastle-in match hmasa berah an tiat tawk tura ngaih West Ham lakah 4-2 in an chak lo nghal a, Aston Villa lakah 2-0 a an tlawm zui avangin an ṭha tawk lo tih a lang. Steve Bruce-a hote hian Southampton nen 2-2 a inhnehtawkin point an hlawh chhuak a, Man United nen an inkhelh ṭumin Cristiano Ronaldo an ngam loh avangin 4-1 ngawtin an chak lo.

Insiamṭhatna
Leeds United-in Liverpool an hneh loh zawhah Marcelo Bielsa chuan, "Keimah ngei pawh hi ka che ṭha tawk lo a, tun season-a ka team enkawl danah hian ka lungawi lo," tiin player a la rem fuh tawk lo tih a pawm.

Bielsa hian Rodrigo chu no. 10 role an pe a, tun thleng chuan a la hlawhtling lo. Liverpool nen hian player thar Daniel James pawh a inlan a, danglamna a thlen thei bik lo.

Premier League thuneituten Pascal Struijk red card an sutsak lo a, chuti chung chuan Elland Road-ah an khelh dawn avangin chhuanlam siam a thiang lo. Raphinha, Jack Harrison leh Patrick Bamford te tlarhma lamah an che ṭhat a ṭul a ni.

Newcastle lamah pawh pound maktaduai 25-a an lakluh Joe Willock-a'n goal a la khung lo. Arsenal forward hlui Willock hian season liam ta khan loan hmanga a khelhna Magpies tan hian Premier League match 14-ah goal riat a khung a, Leeds lakah hian a theihna lanchhuahtir a ṭul.

Magpies hian forward chak ṭha Allan Saint-Maximin an kawl a, French forward hi hmuhnawm viau mah se goal khung thei tak a ni bik lo. Kum 24 mi Saint-Maximin hian Manchester United tlarhnung a chhaih buai thei a, Leeds tlarhnung tan pawh buaipui tham a tling ang.

Team pahnih tan point thum hlawhchhuah a pawimawh a, team pakhat tan chauh point thum hi a awm avangin attacking game khel ṭhin Leeds leh counter attack hmang thiam Newcastle inkhel hi a hmuhnawm khawp ang.