Hmasawn zel duh Raducanu

US Open nomawi a chawiah khan duhtawk mai a tum lo a, tunah chuan hmasawn chaka a tuihal reng thu Emma Raducanu chuan a sawi - British mipui tan chuan thu hriat nuam tak a ni ngei ang.

Kum 18 mi Raducanu hian Leylah Fernandez hnehin US Open title a la a, kum 44 chhung zet an lo nghah tawh chu British mipui ten an hmu - an mi leh sa ngeiin Grand Slam nomawi a chawi ve leh ta.

Raducanu chuan, "Chawlh kar sarih chhung hahchawlhna hun nei miah loin ka inkhel char char a, tunah chuan rei vak lo chawlhna hun a ni. Chumi hnuah chuan hmasawn tumin ka bei chhunzawm leh ang.

"Nomawi pakhat ka chawi avangin a ṭha ber ka ni tihna pawh a la ni lo, hmasawnna tur leh zir tur tam tak ka la nei reng. A tam thei ang ber tournament khel tura inbuatsaih a ngai," a ti.

World number 150 ni chungin US Open a khel a, a champion avang hian tournament zawh hnua world ranking chhuak thar berah chuan 23-na dinhmun a luah thei hial, season tawp hmain a la kaisang leh hial mai thei.