Allegri a lungngai lo

Juventus coach Massimiliano Allegri chu season an ṭan danah a lungngai lo a, match khelh hmabak an la neih tam avangin insiamṭhatna hun remchang an la ngah thu a sawi bawk.

Old Lady hian Serie A an match hmasa pathumah point khat chiah an hlawh chhuak, table-ah 16-na dinhmun an luah mek; an elpui club ṭhenkhatin point kua an hmuh tawh avangin hna a hautak tawh dawn.

Italian manager Allegri chuan, "Match hmasa pathuma kan chet dan hi kan nihna a ni kher lo, squad chhah ṭha tak kan neih miau avangin lungngaihna tur a awm lo, chutih rualin chetsual reng erawh a remchang lo ang," a ti.

Allegri hian Champions League chu an tan insiamṭhatna remchang a nih thu a sawi a, a sawi lawk ang ngeiin Malmo mualah 3-0 in an chak. Pathianni zan hian league match khel turin AC Milan an mikhual zui leh ang.