FIFA ranking thar 107-naah India an awm

Nimin khan FIFA chuan ranking thar ber a tichhuak a, India chu 107-naah an awm. Croatian coach Igor Stimac hnuaia khel India hian tun hnaiah Nepal ṭum hnih an hmachhawn a, match hmasa zawkah 1-1 a inhnehtawkin match hnuhnung zawkah 2-1 in an inhnehtawk.

Nepal nena ṭum hnih friendly match neih hi FIFA ranking aṭanga chhut chuan India tan a ṭha lo a, Igor Stimac-a hote hi 105-na aṭangin 107-naah an tlak thlak phah a ni. Hetihlai hian India ṭhenawm ram Nepal chu 168-naah an awm a, Bhutan (187), Bangladesh (189), Pakistan (198) leh Sri Lanka (205) te chu an la hniam ve leh chhawng.

FIFA ranking-a pakhatna erawh Belgium an la ni zel a, Brazil-in an dawt. World Cup qualifier-a che ṭha tawk lo France chu palinaah an tla thla a, England-in pathumna an rawn chelh thung. Italy leh Argentina te panganaah leh paruknaah an la awm a, Portugal pawh hma sawn hretin pasarihnaah an awm a, Spain erawh pariatnaah an tla thla.

Asia zinga sang ber chu Iran an ni a, 22-naah awmin Japan (26), Australia (32), South Korea (36) leh World Cup thlengtu tur Qatar (43) ten an dawt a ni.