Haaland a ropui zel; goal li nena bul ṭantu Haller

Champions League group C inkhel a hmuhnawmin a ngaihnawm hle - rawlthar duhawm Jude Bellingham leh Erling Braut Haaland goal hmangin Borussia Dortmund an chak a, khualmualah 2-1 in Besiktas an hneh.

Ajax-in khualmualah 5-1 in Sporting Lisbon an sawp a, Dutch club tan Sebastien Haller chuan goal li ngawt a khung - West Ham striker hlui hian Dutch club tan a hming a chher zel.

Hey Jude!
Dortmund tan Jude Bellingham-a'n minute 20-na lekah goal hmahruai a khung a, ṭha taka a tlan hnuah a goal hnihna khungna remchang nei bawk mah se a chance neih vawi hnihna erawh a chhawr thei lo.

Kum 18 mi rawlthar duhawm hian tun season inelna hrang hrangah match sarih khelin goal hnih a khung tawh a, assist vawi li a nei der tawh bawk - a chanchin kan la hre dawn chauh.

A hming Haaland
Haaland chanchin inhrilh nawn fo a ngai lo - first half hun pek belhah an goal hnihna a khung a, Red Bull Salzburg leh Dortmund tan Champions League match 17 leka goal 21 a khung tlinna a ni der!

Kum 21 mi striker hi Champions League-a goal 17 khung tling thei naupang ber a ni a, CL goal 21 khung tling tura match mamawh tlem ber a ni bawk - amah hnaih bertu Ruud van Nistelrooy khan match 27-ah heti zat goal hi a khung ve hram.

Beidawng lo Besiktas
Dortmund-in an rawlthar pahnih Bellingham leh Haaland hmangin Besiktas an ngam a, Haaland phei chu tun season match sarih a khelha goal kua a khung tlinna a ni leh der tawh.

Mahse, Besiktas an tlawm duh bik lo - Chelsea aṭanga loan-a an hawh Michy Batshuayi hun ṭha neih chu Dortmund goalkeeper Gregor Kobel chuan uiawm takin a dansak a, hun pek belh minute linaa Javi Montero-a goal khung erawh a team beng harh nan a tlai hret tawh.

Goal a sur
Group C inkhel dangah Ajax-in goal nga zet an khung a, Sebastien Haller chuan first half leh second half-ah goal hnih ve ve a khung a, Steven Berghuis chuan goal khat a khung ve bawk.

Kum 27 mi Haller-a'n minute kua chhungin goal hnih a khung hman a, mualneitu Sporting tan Paulinho chuan goal khat rawn khung ve mah se Ajax lamin goal thum an khung belh a, a tawpah 5-1 in an chak.

Hammers duh loh
Ivory Coast international Haller hian 2018-19 season khan Eintracht Frankfurt tan match 41-ah goal 20 a khung a, Hammers-in an player man to ber ni turin pound maktaduai 45-in an lei.

Mahse, Premier League club-ah beisei a phak lo a, a season hmasa berah match 35 khelin goal sarih chiah a khung. A season hnihnaah match 19-ah goal sarih khung hman mah se January khan Ajax a pan a, match 23-ah goal 13 a khung.

A vul leh ta
Haller hi season hmasa khan Ajax-in tihsual palh avangin Europa League-a an squad-ah an telh lo a, tun season-ah an tisual nawn tawh lo - goal hmangin a team rinna a chhanglet zui a, tun season inelna hrang hrangah match ruk khelin goal riat a khung ta.

Kum 1992 khan Dutch forward ropui Marco van Basten chuan AC Milan tan IFK Goteborg lakah goal li a khung a, Van Basten hnuah Champions League match khelh hmasak bera goal li khung leh thei chu Haller hi a ni.