Inter mualah Real Madrid an chak

Goal khung theihna remchang insiam hnem zawk ni mah se Inter Milan tlarhmaten Thibaut Courtois an paltlang thei miau lo a, hun tawp dawna substitute Rodrygo goal khat hmangin Real Madrid chuan San Siro 1-0 in an luhchhuah.

Real Madrid leh Inter Milan te hi season hmasa Champions League-ah khan group khatah an awmdun tawh, Italian club hian knockout stage an lut phak lo - match hmasa bera an chak loh leh nghal avangin an hma hun a harsa leh dawn.

Group D inkhel dangah, a vawi khat nana Champions League kheltu Sheriff Tiraspol chuan an mikhual Shakhtar Donetsk 2-0 a hnehin hma an hruai. Maldovan club hian an match lehpek atan Real an tlawh ang a, Shakhtar leh Inter an inkhel ve thung ang.

Hazard a tel lo
Season hmasa khan San Siro-ah Eden Hazard-a'n penalty chhuih lutin Real Madrid chu 2-0 in hnehna a chanpui a, season kal laiah Real Madrid tan a la inlan kim vek avangin Hazard hi Inter lakah pawh bul ṭan ngei tura ngaih a ni - mahse bench lamah hun a hmang tluan.

Carlo Ancelotti-a'n hliam vangin Marcelo, Toni Kroos, Gareth Bale, Dani Ceballos leh Ferland Mendy te a chhawr thei lo a, 100% fit lo chungin Luka Modric leh David Alaba te an inlan - Hazard aiah hian Lucas Vazquez chu thlan a ni thung.

Nerazzurri pawh an duh ang thlapin an inrem thei bik lo. Stefano Sensi a awm loh avangin tlarhnungah Alessandro Bastoni hmel kan hmu a, player thar Denzel Dumfries pawh dam tawh mah se bench aṭanga luhtir chauh a la ni ve bawk.

Dzeko leh Martinez
Inkhel bul ṭan aṭangin Inter Milan chu goal nawr na zawk an ni. Lautaro Martinez-a'n player pahnih inkara a ball lirh luh dawngtu Edin Dzeko-a'n keeper chauh hmachhawn tawh mah se a hun taka rawn tawlh hma Thibaut Courtois a paltlang thei lo.

Italian club lamin counter attack aṭangin an vaw let fo a, winger Ivan Perisic-a cross tawih zet mai Martinez-a tauh pawh Courtois ṭhatzia lantirtu a ni a, Argentine striker hian a hun ṭha neih hnuhnung zawk pawh goal ban hrulah a tauh liam.

Romelu Lukaku hmun ruak luahtu Dzeko vanneih loh zan a ni a, hnai tak aṭanga a tauh luh loh bakah, defender Dumfries-a siamsak a tlawh goal loh chu ho angreng tak a ni, chutih rualin Belgium international keeper Courtois chu a awm hmun tur dik taka a lo awm zel avangin khung a harsa.

A tawpah goal
Inter Milan keeper Samir Handanovic-a'n hna thawh tur nei lo a ni bik lo, corner aṭanga ball kal Eder Militao-a'n goal ban hrula a tauh liam puat lai te khan a thin phu a rang khawp ang; defender Skriniar-a'n Vinicius shot tawih zet a lo dan persak hman bawk.

Goal a lut thei lo, point khat ve ve an hmu dawn niin a lang hman. Hun tawp hma minute khat chauh awm tawhah substitute Rodrygo-a'n chakna goal a khung, laklawh nei miah loa ball pass tu Eduardo Camavinga hming lam rik tel ngei a ngai.

Midfielder Federico Valverde-a through ball kang chu leia a tlak hmain Camavinga-a'n a cross zui a, box laia lo changtu Rodrygo chuan ball-in lei a deh hma bawka lo volley zuiin, keeper Handanovic tan dan hman a ni tawh lo.

Hazard tel lo
Real Madrid manager Carlo Ancelotti-a'n Inter Milan hmachhawn turin Hazard aiah Lucas Vazquez a thlang zawk a, goal khung an mamawh lai pawhin kum 20 mi Rodrygo leh kum 18 mi Camavinga te a dah lut zawk.

Rodrygo leh Camavinga te hian Champions League lamah sulhnu ropui tak an la nei lem lo, mahse Italian manager-in a rin leh beiseina an tithlawn lo. An chet ranna hmangin Inter tlarhnung an chhaih buai fo a, beisei phak lo Hazard tan pawh hmun chang tura elpui tham an ni tih a lang.

Manager tawnhriat nei hnem Ancelotti hian team din thar leh a tumna lamah player naupang zawk a ring ngam dawn niin a lang a, chutih rualin Kroos leh Bale te an inkhelh leh theih hunah chuan a la siksawi kual leh ngeiin a rinawm.

A tawp thlengin rilru kan pek a ngai tih a lang, hmalam thlir ila kan tlang ngei pawh ka ring. A hmuna entu an awm leh ta hian inkhelh a la ti nuam zel, mahse fans lam duh leh beisei ang kan thlentir thei lo erawh a pawi. - Simone Inzaghi, Inter Milan coach

Chak mah ila kan fimkhur a ngai dawn hle, a nihna takah chuan first half chhunga goal kan chhuah lo kha kan vannei hle. Inkhel dangah Sheriff Tiraspol an chak a, group hriatthiam harsa tak kan ni dawn tih a lang.
- Carlo Ancelotti, Real Madrid coach