Lungei District FA luang chhuak

Myanmar aṭanga Mizorama raltlan rawn lutte tan Lunglei District Football Association (LDFA) a che chhuak. Lunglei DFA hian Thingsai khuaa Myanmar raltlante a hmunah kal chilhin tanpuina an hlan.

LDFA hian ‘HPC Cup 2021’ a ticket an hralhna aṭanga an sum hmuh tlingkhawmin thilpekte hi an hlan a, an hruaitu mi 10 feh chhuakin Thingsai khawtlang hruaituten an lo dawngsawng.

Myanmar aṭanga raltlante hnenah hian - Buhfai bag 10, Alu bag 5, Purun bag 2, Dal bag 4 leh Silpaulin 14 an hlan a ni.

Lunglei District Foot-ball Association hian tun hma aṭangin ṭanpui ngaite ṭanpui hna a lo thawk tawh ṭhin. Tui lian leh thlipui tuarte bakah khuarel chhiatna tawkte pualin Charity Match buatsaihin vawi engemawzat ṭanpuina an lo pe tawh bawk.