Nou Camp-ah Roma an lenglut dawn

AS Roma chuan Champions League quarterfinal khel turin Nou Camp an tlawh dawn a, zanin dar 12:15 hian FC Barcelona nen an inhmachhawn ang.

Italian club-in Barca khelmual an tlawh hnuhnun ber chu November 2015 kha a ni a, group stage-ah 6-1 zetin an chak lo. Hemi ṭuma goal hnih ve ve khungtu Lionel Messi leh Luis Suarez te chu tun thlengin Catalan club tan player pawimawh an la ni reng a, Roma tan second leg thlenga beisei nei turin goal venhim ṭhat a ṭul ang.

An dam em?
Barcelona player zingah hrem an awm lo a, defender Gerard Pique leh midfielder Sergio Busquets te an la damchiang lo. Spanish midfielder Busquets hi a kephah ruh hliam vangin March 14 aṭang khan a la inlan leh lo a, zaninah erawh a ṭul dan a zira chhawr theih a ni ang.

Roma lamah Dutch right back Rick Karsdorp leh Turkish winger Cengiz Under te chu hliam vangin an khel dawn lo a, Belgian midfielder Radja Nainggolan erawh a malpuiah hliam tenau nei mah se a inlan theih tho beisei a ni.

Suarez vs Alisson
Barca-in an match hnuhnung bera Sevilla an hmachhawn ṭumin an chesual a, amaherawhchu Suarez leh Messi te zarah point an hlawh chhuak ta tho. Uruguayan striker Suarez hian ram leh club tan match hnuhnung 10-ah goal sarih a khung a, Roma keeper Alisson Becker hi tun hnaia goalkeeper zinga hming chher ber a ni ve bawk.

Suarez hian tun season-ah goal 25 zet khung tawh a, Catalan club tan Champions League inelnaah pawh goal 18 khung tawh mah se tun season bikah chuan Europe inelna lianah hian goal a la khung lo. Amaherawhchu a hmaa ding tur Brazil international keeper Alisson hian tun season-ah Atletico Madrid, Chelsea leh Shakhtar Donetsk te a lo tibeidawng tawh tih a hriat a ṭha ang.

Danglamna Messi
Roma leh Barcelona an inthlau a, mahse football-ah chuan engpawh thleng thei a ni a, Italian club tan La Liga champion ni mai tur dan hi thil theih a ni a, chutihrualin Messi a dam ṭhat chuan 'Roma tan chuan a dan theih loh' an tih pawhin an ṭawng uar hran lo.

Messi hian Italian club vawi 19 a hmachhawn tawhah goal 12 a khung tawh a, Champions League-a goal 100 khung thei player a ni. Argentina captain hian Barcelona tana a match hnuhnung pasarihah goal a khung vek a, heta a goal khung belhkhawm chu goal kua a ni.

Kum 30 mi Messi hian tihrawl na vangin an ram match hnuhnung berah a awl a, Sevilla nen second half-ah lutin si hnih an phurh hnuah hun tawp dawnah siphurh sutna goal a khung. March 4 khan Atletico Madrid an hmachhawn ṭumin ram leh club tana a goal 600-na a khung a, Messi ngei hi player en rawn tur chu a ni thei ang.

Beisei tur a awm
Barcelona hian season 11 chhung a zawnin quarterfinal an thleng a, Catalan club hian 2008-13 chhung khan kum ruk chhung a zawnin semifinal an lut bawk.

Chutihrualin Roma tana hriat nuam tur erawh inelna hnuhnung pahnih leh inelna hnuhnung pali zinga pathum chu quarterfinal-ah hian an tawp a, Italian club tan infuihphurna ṭha tak a ni ang.