Vawiin aṭangin CWG 2018

British (Kumpinu) ram awp tawh ṭhinte infiamna khawmpui lian 2018 Commonwealth Games chu vawiin hian a hawnna neih tur a ni. Tlai dar 2:30 aṭangin Carrara Stadium, Gold Coast, Australia-ah neih ṭan a ni dawn a, opening ceremony hian tlai dar 5:45 thleng a awh ang.

Ram hrang hrang 71 zet inelna turah hian India-in infiammi 221 zet a tir dawn a, heng zingah hian Mizo nula Lalchhanhimi (Weightlifting) leh Lalremsiami (Hockey) te pawh an tel. India team-ah hian infiammi bakah coach 58, doctor leh physiotherapist 17, manager pasarih leh official 22 an tel a, an vaiin 325 an ni.

Opening Ceremony neihna tur Carrara Stadium-ah hian mipui 35,000 an leng a, ticket man hi $100 (Rs 6,502) niin, naupang tan a man chanve a ni thung.

Hawnna hunah hian ram ram hrang infiammite an parade dawn a, zaithiam zai leh lam hmuhnawm tak tak hmangin hun hman chhunzawm a ni ang.