Heavy Metal vs Tiki Taka

Liverpool boss Jurgen Klopp-a ṭawngkam lar tak pakhat chu, "Ball chan tam leh pass tam tak neih hi ka ngaih danah chuan rimawi muang mar raiha a ri ang mai hi a ni a, a thawm a na lo. Kei chu heavy metal ngainatu ka ni a, a ring thei ang ber ka duh ṭhin," tih hi a ni.

Klopp-a'n game rang tak khelin a naute a tlan tamtir ṭhin a, he inkhelh dan hmuhnawm tak hi 'heavy metal' tiin a hming an puttir hial. Club tam takin he 'heavy metal' ring tak hi an dawl zo lo a, Liverpool tlarhmain an hmingṭhatpui.

Heavy Metal boruak kara ding chhuak thei tura beisei ber chu Manchester City an ni a, zanin dar 12:15-ah Champions League quarterfinal first leg khel turin Anfield an pan dawn–khawvelin he inkhel tur hi a nghakhlel.

Liverpool trio
Reds tlarhmaah Mohamed Salah, Roberto Firmino leh Sadio Mane te an awm a, tun season-ah kher chuan Europe-a tlarhma inkawp hlauhawm ber pawl an ni. Salah-a'n goal 37 a khung tawh a, goal 23 khungtu Firmino leh Mane (15 goals) te lah an duai bik lo.

Manchester City manager Pep Guardiola pawhin Liverpool tlarhma hlauhawmna a hai lo. Catalan manager chuan, "Salah chauh pawh a ni lo. Mane leh Firmino an la nei tel a, dan theih loh deuh thaw an ni a, an hmuhnawm a ni," a ti.

Liverpool tlarhma laiah Firmino chu innghahna a ni a, Brazilian forward hi a laiah chauh awm loin a tlan tam ṭhin. Mual ding lamah Salah awm mah se Egyptian forward hi goal zawngin a laiah a tlan lut nasa a, vei lama awm Mane-a'n tlarhnung thlengin a pui ṭha hle bawk.

An dang chuang lo e!
Liverpool tlarhmain sawi an hlawh a, manager Klopp erawh City aia ṭha zawkah a indah duh lo. German coach chuan, "Tun dinhmun tak hi kan sawi dawn a nih chuan City nen ṭha zawk kan awm lo. Mahse, anni chuan match tinah an khelh dan ngai rengin an khel a, hei vang tak hian league-ah pawh point 18 ngawta phak lo kan ni," a ti!

Tlarhma hmuhnawm ve ve an nih miau avangin team pahnih ropuina hi an tlarhma aṭangin teh loh theih a ni lo, he tehna aṭanga en erawh chuan Premier League-a hniam zawk Liverpool hi team ṭha zawk an ni. Firmino, Mane leh Salah ten Reds tan inelna hrang hrangah match 119 khelin goal 75 an khung a, match 149-a goal 76 khungtu Leroy Sane, Raheem Sterling, Sergio Aguero leh Gabriel Jesus ten an phak lo hle.

Club pahnih player zingah Salah chu goal-a inrawlh hnem ber a ni a, tun season-a Liverpool goal 47-ah a inrawlh tawh–goal 37 a khung bakah assist vawi 10 a nei. Salah hnaih bertu Sergio Aguero chu goal 37 (30 goals, 7 assists)-ah a inrawlh a, pathumna Firmino chu goal 35-ah a inrawlh tawh.

Intawnna hmasa
Team pahnih intawn hmasakah Mane-a'n red card a hmuh hnuin Manchester City an chungnung a, 5-0 in Klopp-a leh a naute an hawtir. Mahse, Anfield-a an intawn leh hnuah Reds an chungnung thung a, 4-3 in tun season Premier League-a an tlawm awmchhun ni turin City hi an lo hneh.

Pep chuan Anfield-a an inkhel hi thlirkirin, "Anfield boruak sangah kan zamral a ni. Reds khelh dan hi hriatthiam a harsa, an che rang a, an thiam em em bawk si," a ti a, an inkhel tur thlir nghal bawkin, "Champions League quarterfinal a ni tawh a, a awlsam dawn lo tih kan hre tur a ni," a ti.

Klopp bawkin a sawi thiam a, German coach chuan, "Nilaini zanah Champions League en tur ni ta ila, Liverpool leh City inkhel ka en ang," a ti! Borussia Dortmund boss hlui chuan sawi zawmin, "Inkhel hmuhnawm a ni dawn tih a chiang a, Anfield-a nih bawk avangin a fuh khawp ang," a ti a, mikhual ral ṭitna hmun an khelmual a chhuang hle.