Pacquiao-a'n WBA title a chuh dawn

Boxer ropui Manny Pacquiao chuan WBA welterweight title chuh turin ring chhung a rap leh dawn ta a, July 14 khian Argentine boxer Lucas Matthysse nen Kuala Lumpur, Malaysia-ah an inhmachhawn dawn.

Filipino fighter hian July 2017 khan Australian boxer Jeff Horn a hmachhawn a, rin loh takin WBO welterweight title chu Horn lakah hian a chan. Nikum September khan inhnek nawn tura ruahman ni mah se Pacman zawk hi a inhnukdawk a ni.

Kum 39 mi Pacman-a hmachhawn tur Matthysse hian fight vawi 44 a hmachhawn tawhah vawi 36 ngawt chu a khingpui a knockout a, vawi 39 hnehna changin vawi li a tlawm.

Philippines-a senator hna thawk mek Pacman tan professional fight vawi 69 a hmachhawnna tur a ni dawn a, boxing chawlhsan tura rawntu, hun rei tak a coach lo ni tawh Freddie Roach chu banin Buboy Fernandez hnuaiah training a nei mek.